काठमाडौं– सिप्रदी ट्रेडिङ प्रालिको सामाजिक उत्तरदायित्व विङ सिप्रदीयन सहायता संस्थाको सहकार्यमा चौतारा साँगाचोकगढी नगरपालिका वडा नम्बर ११ सिन्धुपाल्चोकको नवनिर्मित जनज्योति आधारभूत विद्यालय भवन हस्तान्तरण गरिएको छ । भवन निर्माणमा टाटा कम्युनिटी इनिसियटिभ ट्रस्टको आर्थिक सहयोग र टाटा ट्रस्टको साझेदारी रहेको छ ।

विद्यालय भवनकोे टाटा सस्टेनेबिलिटी गु्रपका महाप्रबन्धक श्रीरंग धवले, सिप्रदीयन सहायता संस्थाका वरिष्ठ उपाध्यक्ष शम्भुप्रसाद दाहाल र चौतारा साँगाचोकगढी नगरपालिका प्रमुख अमानसिंह तामाङले उद्घाटन गरे । 

नेपाल भूकम्प पुनस्र्थापना परियोजनाको हिस्सास्वरूप टाटा कम्युनिटी इनिसियटिभ ट्रस्टको आर्थिक सहयोग र टाटा ट्रस्ट तथा सिप्रदीयन सहायता संस्थासँगको साझेदारीमा ०७२ साल वैशाख १२ गतेको भूकम्पबाट क्षतिग्रस्त भएका सात विभिन्न विद्यालय पुनर्निर्माण गरिएको छ ।

शारदा माध्यमिक विद्यालय, जाल्पादेवी माध्यमिक विद्यालय, मार्मिङ माध्यमिक विद्यालय, थापीनारायण आधारभूत विद्यालय, कोदारी माध्यमिक विद्यालय तथा जनज्योति आधारभूत विद्यालय भवन पुनर्निर्माणसँगै हस्तान्तरण गरिएको हो । हस्तान्तरण भइसकेका विद्यालयमा जनज्योति आधारभूत विद्यालय पनि भूकम्पप्रतिरोधी आधुनिक संरचनामा पुनर्निर्माण गरिएकोे छ । 

‘०७२ को भूकम्पले यस क्षेत्रमा धेरै क्षति गरेको थियो । त्यसैले केही वर्षदेखि पुनस्र्थापना परियोजना अगाडि बढाइरहेका छौं,’ सिप्रदीयन सहायता संस्थाका वरिष्ठ उपाध्यक्ष शम्भुप्रसाद दाहालले भने । 

उक्त अवसरमा टाटा सस्टेनेबिलिटी गु्रपका महाप्रबन्धक धवले, सिप्रदीयन सहायता संस्थाका वरिष्ठ उपाध्यक्ष दाहालका साथै भवन निर्माणमा सहयोग गर्ने विभिन्न सहयोगीलाई सम्मान गरिएको थियो ।

कार्यक्रममा सिप्रदीयन सहायता संस्थाका सहसचिव प्रभाकर मुनकर्मी, रजत श्रेष्ठ, विनोदबहादुर सिंह, विमल गौतम, रविन श्रेष्ठ, स्काई लाइन आर्किटेक र निर्माण कम्पनीका टक्सार अवालेलगायत उपस्थित थिए ।