नवलपरासी- बौदीकाली गाउँपालिकाले प्राविधिक जनशक्ति तयार पार्न छात्रवृत्ति प्रदान गर्दै आएको छ । ‘मेरै गाउँमा, मेरै प्राविधिक’ भन्ने नाराका साथ गाउँपालिकाले प्राविधिक जनशक्ति तयार पार्ने योजनाका अनुसार गत आर्थिक वर्षमा छात्रवृत्ति कार्यक्रम सुरु गरेको थियो । पहिलो वर्ष गाउँपालिकामा छात्रवृत्तिका लागि ४२ जनाको  कोटा निर्धारण गरेकामा प्राविधिक शिक्षा अध्ययनरत २६ जनाले आवेदन दिएर छात्रवृत्ति लिएका छन् । 

गाउँपालिकामा स्थायी रुपमा बसोबास गरी पालिकाभित्रको सामुदायिक विद्यालयबाट एसइई उत्तीर्ण गरी विभिन्न विद्यालयमा/शिक्षालयमा प्राविधिक शिक्षा अध्ययनरत विद्यार्थीलाई मासिक पाँच हजारका दरले छात्रवृत्ति प्रदान गर्ने गरेको अध्यक्ष प्रकाश ओझाले बताए । पालिकाले जुनसुकै प्राविधिक शिक्षा अध्ययन गर्ने विद्यार्थीलाई छात्रवृत्ति उपलब्ध गराउने उनले बताए । छात्रवृत्तिमा आबद्ध भएका विद्यार्थीले वार्षिक रुपमा ६० हजार छात्रवृत्ति प्राप्त गर्नेछन् । 

जिल्लाको पहाडी क्षेत्रअन्तर्गत पर्ने पालिकाका रुपमा रहेको बौदीकालीमा शैक्षिक गुणस्तर कमजोर रहेको र त्यसमा पनि प्राविधिक शिक्षा अध्ययन गर्ने न्यून हुने गरेकाले प्रोत्साहनका लागि छात्रवृत्ति प्रदान गर्न सुरु गरेको गाउँपालिका अध्यक्ष ओझाले बताए । गाउँपालिकाले अहिले शिक्षालाई प्राथमिकतामा राखी शिक्षाको गुणस्तर वृद्धिमा काम गरिरहेको समेत अध्यक्ष ओझाले बताए । “गाउँपालिकाबाट थोरैमात्र प्राविधिक शिक्षा पढ्ने विद्यार्थी पाएपछि प्राविधिक जनशक्ति तयार पार्न पालिका लागेको हो”, गाउँपालिका अध्यक्ष ओझाले भने, “हाम्रो लक्ष्य सीपयुक्त जनशक्ति निर्माण गर्ने हो ।”

गाउँपालिकाले गत वर्षदेखि सुरु गरेको छात्रवृत्ति प्रदान गर्ने योजनाअनुसार चालु आर्थिक वर्षमा समेत उक्त कार्यक्रम समावेश गरेको छ । वार्षिक ४२ जनालाई मासिक पाँच हजार छात्रवृत्ति प्रदान गर्ने योजनाअनुसार यस वर्षका लागि निवेदन माग गरिएको अध्यक्ष ओझाले बताए । गत वर्ष समावेश भएकाबाहेक थप नयाँ ४२ जनाका लागि आवेदन माग गरिएको अध्यक्ष ओझाले बताए । गत वर्ष प्राविधिक शिक्षा अध्ययन सुरु गरेकाले आवेदन दिएर छात्रवृत्ति निरन्तर कायम गराउन  सक्ने उनले बताए । 

गाउँपालिकाको छात्रवृत्ति कार्यक्रममा आबद्ध भएका विद्यार्थीले अध्ययनपछि गाउँपालिकाले आवश्यकताअनुसार सेवामा लिनसक्ने अध्यक्ष ओझाले बताए । छात्रवृत्ति लिने समयमा आवश्यक परे पालिकामा सेवा गर्ने स्वघोषणा विद्यार्थीले गर्ने र सोही आधारमा काममा प्रयोग गर्न सकिने उनले बताए ।

छात्रवृत्ति कार्यक्रमले पहाडी क्षेत्रका विद्यालयमा अध्ययन गर्ने विद्यार्थीको सङ्ख्या वृद्धि गर्नसमेत सहयोग पुग्ने अपेक्षा गरिएको उनले बताए । शिक्षाका लागि सहर बजार झर्ने क्रम बढ्दा पहाडका विद्यालयमा विद्यार्थी न्यून हुँदै गएकाले गाउँमा अध्ययनका लागि छात्रवृत्ति कार्यक्रमले समेत प्रोत्साहन गर्ने अध्यक्ष ओझाले बताए । 

पहाडी क्षेत्रमा पूर्वाधार विकासका काम गर्न जति बाँकी रहेको छ, त्यति नै शिक्षा, स्वास्थ्य, कृषिको व्यावसायिकीकरणसहित सामाजिक विकासमा काम गर्न बाँकी रहेको अध्यक्ष ओझाले बताए । यसका लागि पालिकाले विभिन्न कार्यक्रम अगाडि बढाइरहेको उनले बताए । पहाडी क्षेत्रका विद्यालयमा हालै प्रविधियुक्त सिकाइका लागि विद्यालय छनौट गरी कार्यक्रम अघि बढाएको, कृषि उपजको बजारीकरणका लागि पहिलो पटक हाटबजारको व्यवस्था, दुग्ध सङ्कलन केन्द्र स्थापनालगायत काम गरिएको अध्यक्ष ओझाले बताए ।