दार्चुला– शैल्यशिखर नगरपालिका–४ मल्लो काडाँपारीका ६४ वर्षीया झुम्तीदेवी धामी आइतबार बिहान १० बजेतिर खर काट्ने क्रममा लडेर गम्भीर घाइते भइन् ।

लडेको झण्डै दुई घण्टा पछि घर परिवारलाई थाहा पायो । गवाड खोलामा खर काट्न गएको बेला उनी लडेर घाइते भएकी हुन् । यो बेला दार्चुलाका अधिकांश ठाउँमा खर काट्ने सिजन शुरु भएको छ ।

उनलाई गाउँकै रानीशिखर स्वास्थ्य चौकीसम्म पुर्याउन तीन चार घण्टा बढि समय लाग्यो । स्वास्थ्य चौकीसम्म पुर्याउन धामी परिवारले स्ट्रेचरसमेत पाउन नसकेको पीडित परिवारले गुनासो गरेका छन् । पीडितका श्रीमान तारासिंह धामीले घट्नास्थलबाट स्वास्थ्य चौकीसम्म पुर्याउन स्टेचर नपाएको बताए ।

‘गाउँभरी स्टेचर खोजेँ पाइएन’, उनले भने, स्वास्थ्य चौकीमासमेत नपाएपछि खाटमा राखेर घाइतेलाई स्वास्थ्य चौकी लगियो ।’ लडेर गम्भीर घाइते धामीको गर्धन र खुट्टामा चोट लागेको छ । स्वास्थ्य चौकीमा प्राथमिक उपचारपछि आइतबार बेलुकी गोकुलेश्वर अस्पताल रिफर गरिएको स्वास्थ्य चौकीका सिनियर अहेव कृष्णानन्द पन्तले बताए ।

‘स्वास्थ्य चौकीमा रहेको स्ट्रेचर यसअघि विरामी लिएर कता कता छोडेछन् । गाउँमै स्ट्रेचर पाउनै मुस्किल भएपछि एक घण्टाको बाटोमा खटियामा राखेर विरामी ल्याए’, उनले भने । निशिखर हालसम्म सडक सञ्जालसँग जोडिएको छैन । भिरालो बाटोमा पुरानो स्ट्रेचरमा राखेर उपचारका लागि स्वास्थचौकी लैजानु परेको उनले बताए ।