रुकुम पूर्व– रुकुम पूर्वको भूमे गाउँपालिकाले दुर्गमका बस्तीका बासिन्दालाई लक्षित गरेर हरेक साताको सोमबार एमबीबीएस डाक्टरबाट घुम्ती स्वास्थ्य सेवा सञ्चालन गरिरहेको छ ।

 

आर्थिक समस्यासँगै टाढाको अस्पताल धाउनुपर्ने अवस्थाका विकट गाउँबासीलाई गाउँगाउँमै सेवा प्रवाह गर्ने उद्देश्यले भूमेले हरेक साताको सोमबार घुम्ती शिविर सञ्चालन गरिरहेको हो ।

 

लुम्बिनी प्रदेश सरकारले अस्थायी कोरोना अस्पताल सञ्चालनका लागि गाउँपालिकालाई १० लाख रुपैयाँ बजेट उपलब्ध गराएको छ । उक्त बजेटले गत पुसदेखि वडा नम्बर २ को भूमे स्वास्थ्य चौकी काँक्रीमा कोभिड‐१९ अस्थायी अस्पताल स्थापना गरी करारमा एबीबीएस डाक्टरको व्यवस्था गरिएको गाउँपालिका अध्यक्ष रामसुर बुढा मगरले जानकारी दिए ।

 

हाल डाक्टरबाट साताको ५ दिन कोभिड‐१९ अस्थायी अस्पताल काँक्रीबाट सेवा प्रवाह भइरहेको छ, भने हरेक सोमबार नागरिकको घरदैलोमै पुगेर एबीबीएस डाक्टर अशोककुमार महतोले गाउँबासीलाई स्वास्थ्य सेवा दिन थालेको अध्यक्ष बुढाले बताए ।

 

दुर्गम गाउँठाउँका आर्थिक समस्या र अस्पतालसम्म आउन नसक्ने नागरिकलाई हरेक साता सोेमबार डाक्टरसहित अन्य स्वास्थ्यकर्मीको टोलीबाट घरआँगनमै पुगेर स्वास्थ्य सेवा दिन थालिएको गाउँपालिकाको स्वास्थ्य शाखा सह‐संयोजक सञ्जीव खड्काले जानकारी दिए ।

 

‘कोभिड‐१९ अस्पताल काँक्रीमा सबै नागरिक आउन नसक्ने भएकाले उनीहरूको घरदैलोमै पुगेर स्वास्थ्य सेवा दिन थालेका हौँ’, डाक्टर महतोको भनाइलाई उद्धृृत गर्दै खड्काले भने ।

 

शिविरमा नागरिकको स्वास्थ्यस्थिति अवस्थाबारे अध्ययन गर्नुका साथै कसैलाई जटिल प्रकृतिका रोग देखापरे थप उपचारका लागि परामर्श दिने मुख्य उद्देश्य रहेको सह‐संयोजक खड्काको भनाइ छ । हाल वडा नम्बर १, ३ र ४ मा घुम्ती स्वास्थ्य सेवा दिइसकिएको छ । ती वडामा कुनैमा पनि जटिल प्रकृतिको रोग देखिएको छैन ।

 

२१ जना पुरुष र ४७ जना महिला गरी जम्मा ६८ जनाको स्वास्थ्य चेकजाँच गरिएको छ । जटिल अवस्थाको रोग देखा नपरे पनि १ शिशु कुपोषित, ५ जना महिलामा पाठेघर समस्या, युरिक एसिडका ४ जना र ५ जना प्रेसर बिरामी भेटिएकालाई थप उपचारकन लागि अस्पताल जान परामर्श दिइएको सह‐संयोजक खड्काले बताए । आउँदो सोमबार भूमे वडा नम्बर ६ महतमा स्वास्थ्यशिविर सञ्चालन गरिने स्वास्थ्य शाखाले जनाएको छ ।

काँक्रीबाटै एक्सरे सेवा

कोभिड–१९ अस्थायी अस्पताल काँक्रीमा हाल ल्याब परीक्षणसहितको एमबीबीएस डाक्टरबाट सेवा दिइँदै आएको छ । एक्सरे सेवाका लागि हाल सामग्री खरिद प्रक्रियामा रहेकाले केही समयपछि यस्तो सेवा दिइने गाउँपालिकाले जनाएको छ ।

 

यसले गाउँपालिकाबासी थप स्वास्थ्य सेवाको पहुँचमा पुग्नेछन् । हाल एक्सरे सेवाका लागि नागरिक अस्थायी जिल्ला सदरमुकाम रुकुमकोट, रुकुम पश्चिम, दाङ, नेपालगञ्जलगायत जाने गरेका छन् ।

 

दुर्गम ठाउँमा डाक्टर बस्न मान्दैनन्

 

रुकुम पूर्वका दुर्गम ठाउँमा एमबीबीएस डाक्टरले बस्न अस्वीकार गर्ने गरेका छन् । हालका डाक्टरलाई पनि ३ महिनाको करार सम्झौता गरेर मात्र गाउँ बस्न मनाउनु परेको गाउँपालिका अध्यक्ष बुढाले बताए ।

 

३ महिनाको करार सम्झौता सकिएपछि डाक्टरले पुनः करार नियुक्ति थप गर्न चाहे नियुक्त गरिने उनको भनाइ छ । करार डाक्टर दरबन्दी दरखास्त आह्वान गरेकामा कुनैको पनि निवेदन नपरेपछि डा. महतोलाई गाउँपालिकाको सम्पर्कबाटै नियुक्त गरिएको हो ।