बागलुङ– कोरोना महामारीसँग जुध्न बागलुङका १० वटै स्थानीय तहले साझा कार्यक्रम ल्याउने भएका छन् । स्वास्थ्य सामग्री खरिद, अक्सिजन एवं जनशक्ति व्यवस्थापन र मृतकको शव व्यवस्थापनलगायत काम यहाँका १० वटै स्थानीय तहको सहभागितामा हुने भएको हो ।
आइतबार भर्चुअल माध्यमबाट बसेको १० वटै स्थानीय तहका प्रमुख, उपप्रमुखसहितको बैठकले ५५ लाख रुपैयाँको साझा कोष निर्माणको घोषणा गरेका हुन् ।
सोही कोषको परिचालनबाट स्वास्थ्य सामग्री, जनशक्ति र उपचारका क्रममा मृत्यु हुनेको दाहसंस्कार गरिने भएको हो । कोषको रकम अक्सिजन ढुवानी र व्यवस्थापनको काममा समेत खर्च हुनेछ ।
कोषमा बागलुङ नगरपालिकाले १० लाख र अन्य सबै स्थानीय तहले ५÷५ लाख रुपैयाँ जम्मा गर्ने सहमति भएको छ ।
‘अहिले बिरामीको उपचार धौलागिरि अस्पताल केन्द्रित भइरहेको छ । सोहीअनुसारको तयारी हामीले गर्नु छ,’ बागलुङ नगरपालिका प्रमुख जनकारज पौडेलले भने, ‘हामीले कोष बनाएका छौँ । अस्पतालसँग समन्वय गरेर आवश्यक ठाउँमा कोषको परिचालन हुन्छ ।’
बागलुङ नगरपालिकामा रहने कोषको रकम खर्चका लागि धौलागिरि अस्पतालले अधिकार पाएको छ । अस्पतालको अवश्यकताका आधारमा खर्च गर्न पालिका प्रमुखहरू सहमत भएका हुन् ।
बैठकले कोरोना महामारीको समयमा समेत यहाँका स्वास्थ्य संस्थामा जनशक्ति अभाव भइरहेको विषयमा प्रदेश र संघ सरकारको ध्यानाकर्षण गराएको छ ।
कोभिड नियन्त्रणमा थप जनशक्ति आवश्यक देखिएकाले गण्डकी प्रदेश सरकारको सामाजिक विकास मन्त्रालय र संघीय सरकारको स्वास्थ्य तथा जनसंख्या मन्त्रालयको ध्यानाकर्षण गराइएको पौडेलले जानकारी दिए ।
गत वर्ष पनि कोरोना महामारीको समय यहाँका स्थानीय तहले भारतलगायत देशबाट आउनेलाई क्वारेन्टाइन व्यवस्था, नमुना संकलन तथा परीक्षण, राहतलगायतका लागि संयुक्त कोष बनाएर काम गरेका थिए ।