बागलुङ– गण्डकी प्रदेशका सेकेन्डरी ‘ए’ लेभलका चिकित्सा संस्थाहरूमा बागलुङको धौलागिरि अस्पताल उत्कृष्ट भएको छ । स्वास्थ्य मन्त्रालय, स्वास्थ्य निर्देशनालय गण्डकी प्रदेश पोखराले गरेको अध्ययनमा अस्पताल उत्कृष्ट घोषित हुँदै पहिलो भएको हो ।
निर्देशनालयका अनुसार प्रदेशभर रहेका ‘ए’ लेभलका ३ मध्ये धौलागिरि अस्पतालले न्यूनतम मापदण्ड पूरा गरेको पाइएको हो । विभिन्न मापदण्ड बनाएर गरिएको सर्वेक्षणमा १ सय पूर्णांकमा अस्पतालले ७३ नम्बर प्राप्त गरेको अस्पताल व्यवस्थापन समितिका सदस्य शालिग्राम शर्माले बताए ।
‘अस्पतालको सबैभन्दा राम्रो अंक अप्रेसन थियटरमा आएको छ । क्यान्टिनको व्यवस्था नभएकाले १७ अंक गुम्यो,’ शर्माले भने, ‘अरू सबै मापदण्डअनुसारको सेवा र पूर्वाधार रहेको भन्दै हामी उत्कृष्ट घोषित भएका छौँ ।’ बेनी अस्पताल म्याग्दी र गोरखा अस्पताललाई गण्डकी प्रदेश सरकारले ‘ए’ तहका अस्पतालको रूपमा विकास गरिरहेको छ ।
निर्देशनालयका अनुसार बेनी अस्पतालले ४० र गोरखा अस्पतालले ६५ अंक प्राप्त गरेका छन् । कोभिड–१९ र अन्य रोगको उपचार तथा प्रशासन र पूर्वाधारको समेत मूल्यांकन गरेर अस्पतालको स्तरीकरण गरिएको हो । गण्डकीमा रहेका अन्य सबै अस्पताल जिल्ला अस्पतालको रुपमा रहेका छन् भने गण्डकी पोखरा प्रादेशिक अस्पताल हो ।
प्रदेशभर रहेका जिल्ला अस्पतालहरूको स्तरीकरणमा जिल्ला अस्पताल पर्वत प्रथम भएको थियो । धौलागिरि अस्पतालमा रहेको जनशक्ति, उपलब्ध सेवा, सेवामा चुस्तता, पूर्वाधारलगायत शीर्षकमा मूल्यांकन भएको थियो ।