जुम्ला– जुम्लामा ४७ जनामा कोरोना परीक्षण गर्दा १८ जनामा संक्रमण पुष्टि भएको छ । जिल्ला प्रशासन कार्यालय जुम्लाले शनिबार सार्वजनिक गरेको प्रतिवेदनअनुसार कर्णाली स्वास्थ्य विज्ञान प्रतिष्ठानमा पिसिआर परीक्षण गर्दा उक्त संख्यामा संक्रमण देखिएको हो ।
जुम्लामा ८ वैशाखदेखि कोरोना संक्रमण पुष्टि हुनेको संख्या १ हजार ४ सय ८२ पुगेको छ भने शनिबारसम्म संक्रमणमुक्त हुनेको संख्या १ हजार २ सय ३६ जना रहेका छन् । प्रशासनले सार्वजनिक गरेको तथ्यांकअनुसार जुम्लाका १२ र जिल्लाबाहिर ४ जना गरी कर्णाली स्वास्थ्य विज्ञान प्रतिष्ठानमा कोरोना संक्रमणका कारण १६ जनाको मृत्यु भएको छ ।
कर्णाली स्वास्थ्य विज्ञान प्रतिष्ठान जुम्लाको कोभिड अस्पतालमा २५ जना उपचाररत र १९४ जना होम आइसोलेसनमा सक्रिय संक्रमित रहेको प्रमुख जिल्ला अधिकारी विजयाकुमारी प्रसाईंले बताइन् ।
जिल्लामा कोरोनाविरुद्धको पूर्ण खोप लगाउनेको संख्या १० हजार १३४ र १२ हजार ७५४ जनाले दोस्रो डोजको खोप लगाउन बाँकी रहेको सार्वजनिक तथ्यांकमा उल्लेख छ । हालसम्म जुम्लाका २२ हजार ८८८ नागरिकले कोरोनाविरुद्धको खोप पाएका छन् । तर, यहाँको जनसंख्या १ लाख २६ हजार ३८० छ ।