काठमाडौं– नेपालमा करिब आधा जनसंख्याले कोरोना खोपको पहिलो डोज लगाएको स्वास्थ्य मन्त्रालयले जनाएको छ । स्वास्थ्य तथा जनसंख्या मन्त्रालयको तथ्यांकअनुसार १ करोड ५२ लाख ४९ हजार १ सय २९ जनाले पहिलो डोज लगाएका हुन् । यो कुल जनसंख्याको ५०.२ प्रतिशत हो ।  यसैगरी १ करोड १३ लाख ३६ हजार ५ सय ३८ जनाले पूरा डोज लगाएका छन्, जुन कुल जनसंख्याको ३७.३ प्रतिशत हो । 

तर, लक्षित जनसंख्यामा भने ७६.५ प्रतिशतले पहिलो डोज लगाएका छन् । सरकारले खोप अभियान सुरु गर्दा १८ वर्षमाथि उमेर भएकालाई लक्षित जनसंख्यामा राखेको थियो । केन्द्रीय तथ्यांक विभागका अनुसार नेपालमा १८ वर्षमाथिका जनसंख्या १ करोड ९९ लाख २२ हजार १ सय ६४ छ । 

यो हिसाबले १८ वर्षमाथिका १ करोड ५१ लाख ८० हजार ६ सय ८८ जनाले खोपको पहिलो डोज लगाइसकेका छन् । अब करिब ४८ लाख जनाले मात्र खोप लगाउन बाँकी छ । तर, त्यसमध्ये कतिपय विदेशमा रहेकाले खोप लगाउन बाँकी रहेका अझै कम हुन सक्छन् । 

१८ वर्षमाथिका ५६.९ प्रतिशत मानिसले भने खोपको पूरा डोज लगाएका छन् । अर्थात् १८ वर्षमाथिका १ करोड १३ लाख ३५ हजार ७ सय ११ जनाले पूरा डोज लगाएका छन् । मन्त्रालयको तथ्यांकअनुसार नेपालमा हालसम्म ३ करोड ९२ लाख ३ हजार ९ सय २७ डोज खोप भित्रिएको छ ।