काठमाडौं– बागमती प्रदेशमा पछिल्लो १० दिनमा कोरोना संक्रमित हुनेको संख्या १२ गुणा बढेको छ । प्रदेशको स्वास्थ्य मन्त्रालयको तथ्यांकअनुसार २० पुसमा बागमती प्रदेशमा कोरोना संक्रमितको संख्या २५३ थियो भने ३० पुसमा आइपुग्दा यो संख्या बढेर ३ हजार ८९ पुगेको हो । प्रदेशमा २१ पुसदेखि संक्रमितको संख्या बढिरहेको पाइएको छ ।
२१ पुसमा बागमती प्रदेशका २८७ जनामा संक्रमण पुष्टि भएको थियो । त्यसयता, २२ पुसमा ३५०, २३ पुसमा ४३०, २४ पुसमा ५३६, २५ पुसमा ६६२, २६ पुसमा मा ९८६ जनामा संक्रमण देखिएको थियो ।
बागमती प्रदेशमा २७ पुसबाट कोरोना संक्रमितको संख्या ४ अंकमा प्रवेश गरेको हो । स्वास्थ्य मन्त्रालयको तथ्यांकअनुसार २७ पुसमा १ हजार ५०८ जनामा संक्रमण पुष्टि भएको थियो, जुन २० को तुलनामा करिब ६ गुणा बढी हो ।
२८ पुसमा कोरोना संक्रमणको दर बढेर १ हजार ८५१ जनामा पुगेको थियो । २९ पुसमा संक्रमितको संख्या २ हजार नाघेको थियो । यो दिन बागमती प्रदेशका २ हजार २१३ जनामा संक्रमण पुष्टि भएको थियो ।
३० पुससम्म बागमती प्रदेशमा कोरोना संक्रमणको दर ३ हजार बढी पुगेको छ । यो दिन प्रदेशका ३ हजार ८९ जनामा संक्रमण पुष्टि भएको मन्त्रालयको तथ्यांकमा उल्लेख छ । यो संख्या २० पुसको तुलनामा १२ गुण बढी हुन आउँछ । त्यस्तै, १ माघमा प्रदेशभर २ हजार ८०४ जनामा संक्रमण पुष्टि भएको छ ।
सक्रिय संक्रमितको संख्या ६ गुणाले बढी
पछिल्लो १० दिनमा बागमती प्रदेशमा कोरोनाका सक्रिय संक्रमितको संख्या ६ गुणाले बढेको छ । २० पुसमा प्रदेशभर २ हजार ५२२ जना सक्रिय संक्रमित रहेको प्रदेशको स्वास्थ्य मन्त्रालयको तथ्यांक छ । त्यसयता यो संख्यामा क्रमिक वृद्धि हुँदै १ माघसम्म १५ हजार ३३८ जना सक्रिय संक्रमित पुगेका छन्, जुन संख्या २० पुसको तुलनामा ६ गुणा बढी हो ।
बागमती प्रदेशमा २१ पुसमा २ हजार ६५६ जना सक्रिय संक्रमित थिए भने २२ पुसमा २ हजार ८३३, २३ पुसमा ३ हजार ९०, २४ पुसमा ३ हजार ५१२, २५ पुसमा ४ हजार ४५, २६ पुसमा ४ हजार ८३९, २७ पुसमा ६ हजार १७२, २८ पुसमा ७ हजार ८८१, २९ पुसमा ९ हजार ९२७, ३० पुसमा १२ हजार ८५० जना सक्रिय संक्रमित छन् ।
बागमती प्रदेशमा कोरोना भाइरसका अधिकांश सक्रिय संक्रमित होम आइसोलेसनमा छन् । प्रदेशको स्वास्थ्य मन्त्रालयको तथ्यांकअनुसार कुल सक्रिय संक्रमितमध्ये १४ हजार बढी होम आइसोलेसन बसेका छन् ।
कुल १५ हजार ३३८ जना सक्रिय संक्रमितमध्ये १४ हजार ७०३ जना होम आइसोलेसनमा बसेका छन् । अन्य संक्रमित प्रदेशका विभिन्न अस्पताल तथा आइसोलेसन सेन्टरमा उपचाररत छन् ।
मन्त्रालयका अनुसार सक्रिय संक्रमितमध्ये ६३३ जना संस्थागत आइसोलेसनमा उपचाररत छन् भने जनरल आइसोलेसनमा २२८, एचडीयूमा ३१४, आइसीयूमा ७५ र भेन्टिलेटरमा १६ जना छन् ।