जुम्ला– जिल्ला प्रशासन कार्यालय कालीकोटका प्रमुख जिल्ला अधिकारी, सहायक जिल्ला अधिकारीलगायत कर्मचारीमा कोरोना संक्रमण देखिएपछि एक साताका लागि सबै खाले प्रशासनिक सेवा बन्द गरिएको छ ।

कार्यालय प्रमुखसहित अन्य कर्मचारीमा कोरोना संक्रमण देखिएपछि बुधबारदेखि एक साताका लागि कार्यालयबाट प्रवाह हुने सबै सेवा बन्द गरिएको हो । 

प्रमुख जिल्ला अधिकारी रामहरि शर्मा, सहायक प्रमुख जिल्ला अधिकारी देवेन्द्रप्रसाद श्रेष्ठलगायतका कर्मचारीलाई कोरोना संक्रमण पुष्टि भएपछि जिल्ला प्रशासन कार्यालयबाट प्रवाह हुने सबै सेवा बन्द गरिएको जिल्ला प्रशासन कार्यालय कालीकोटले जनाएको छ । 

जिल्लाका धेरै कार्यक्रममा सहभागी हुँदा स्वास्थ्यमा असहज भई टन्सिल भएपछि परीक्षण गराउँदा कोरोना पुष्टि भएको प्रमुख जिल्ला अधिकारी शर्माले बताए । अन्य कर्मचारीमा पनि कोरोना संक्रमण पुष्टि भएकाले कार्यालयबाट प्रवाह हुने सेवा एक साताका बन्द गरिएको प्रमुख जिल्ला अधिकारी शर्माले जानकारी दिए ।

कालीकोटमा संक्रमण बढ्दो 

कालीकोटमा कोभिड– १९ को संक्रमण दर बढ्दो क्रममा रहेको छ । राजनीतिक दलका भेला, सम्मेलन नरोकिएका कारण जिल्लामा कोभिड संक्रमण बढेको हो ।

कोभिड संक्रमण देखिएका सबै राजनीतिक दलका कुनै न कुनै कार्यक्रममा सहभागी रहेको पाइएको जिल्ला स्वास्थ्य कार्यालय कालीकोटले जनाएको छ ।

स्वास्थ्य सेवा कार्यालय कालीकोटका जनस्वास्थ्य अधिकृत गौराकुमारी घर्तीमगरका अनुसार तेस्रो लहरको कोरोनाबाट कालीकोटमा ७१ जना संक्रमित भएका छन् ।

जिल्लामा कोभिड संक्रमण तीव्र रूपमा बढेको जिल्ला स्वास्थ्य कार्यालयका निमित्त प्रमुख कटकबहादुर महतले जानकारी दिए । उनले भने, ‘विगतको तुलनामा तेस्रो चरणको कोभिड लहरले भयावह रूप लिएको छ ।’

कोभिडका संक्रमित विभिन्न होम आइसोलेसनमा रहेको निमित्त प्रमुख महतले बताए ।  जिल्लामा हालसम्म कोभिडविरुद्ध पहिलो मात्राको खोप लगाउनेको संख्या ८१ हजार १ सय ८१ जना रहेको र ४६ हजार ३ सय १३ जनाले दोस्रो डोज लगाएको जिल्ला स्वास्थ्य कार्यालय कालीकोटको तथ्यांकमा उल्लेख छ । 

हालसम्म कालीकोटमा कुल जनसंख्याको ५० प्रतिशतले पहिलो मात्रा र २८ प्रतिशतले दोस्रो मात्रा तथा १२ वर्षमाथिको लक्षित जनसंख्यामा ६५ प्रतिशतले पहिलो र ३७ प्रतिशतले दोस्रो डोज लगाएको स्वास्थ्य कार्यलय कालीकोटले जनाएको छ । 

कर्मचारी संक्रमति भएपछि बैंकिङ सेवा प्रभावित

राष्ट्रिय वाणिज्य बैंक सुर्खेत शाखामा कार्यरत कर्मचारीमा कोरोना संक्रमण देखिएपछि बैंकबाट प्रदान गरिने सेवा बन्द गरिएको छ । आइतबार बैंकका कर्मचारीमा कोराना पुष्टि भएकाले सोमबारदेखि बैंकिङ सेवा अवरुद्ध भएको हो ।

बैंकमा कार्यरत १८ कर्मचारीमध्ये १० जनामा कोरोना पुष्टि भएको हो । १० कर्मचारीमध्ये १ जनामा गम्भीर लक्षण देखिएको र बाँकी ९ कर्मचारी होम आइसोलेसनमा रहेको बैंकका प्रमुख लीलाराम ढुंगानाले बताए ।

‘१ जना सुरक्षार्थ खटिने सुरक्षागार्डलाई प्रदेश अस्पतालस्थित कोरोना विशेष अस्पतालमा भर्ना गरिएको छ,’ उनले भने, ‘४ दिनका लागि बैंकिङ सेवा बन्द गरेका छौँ ।’