मोरङ– मोरङको विराटनगर महानगरपालिकाले कोभिड संक्रमण नियन्त्रण, रोकथाम तथा व्यवस्थापनका लागि सम्पूर्ण तयारी गरेको जनाएको छ ।

महानगर प्रमुख भीम पराजुलीले ओमिक्रोन तथा कोभिड नियन्त्रण र व्यवस्थापनका लागि अक्सिजन तथा आइसोलेसन शय्याको व्यवस्थापन तथा सीमा नाकामा एक दर्जन चिकित्सक परिचालन गरी एन्टिजेन परीक्षणको दायरा बढाउनुका साथै आवश्यक हेल्थ डेस्क व्यवस्था मिलाइएको बताए ।

उनले विराटनगर रानीस्थित भारतीय सीमा नाका भएर नेपाल प्रवेश गर्ने सम्पूर्ण व्यक्तिको अनिवार्य एन्टिजेन परीक्षणको व्यवस्था मिलाइएको जानकारी दिए ।

यसैगरी महानगका १९ वटै वडामा खोप केन्द्रमार्फत नियमित खोपको व्यवस्था मिलाइनुका साथै कोभिडविरुद्ध सचेतना फैलाउन माइकिङ, पर्चापम्प्लेट तथा मास्क वितरणलगायत स्वास्थ्य जनचेतनामूलक कार्यक्रमसमेत सञ्चालन गरिरहेको महानगर प्रमुख पराजुलीले जानकारी दिए । 

कोभिड संक्रमित संख्या वृद्धिसँगै खोप लगाउन आउनेको चाप बढ्दै गएकाले खोप केन्द्र विस्तार गर्ने तयारीमा महानगर रहेको उनको भनाइ छ । यसअघि खोप लगाउनेको संख्या कम भएकाले खोप केन्द्रमा भीडभाड थिएन तर अहिले खोप लगाउनेको चाप एक्कासि वृद्धि हुँदा खोप केन्द्रमा भीडभाड बढेकाले त्यसलाई व्यवस्थापन गर्न महानगरपालिका लागिरहेको जानकारी उनले दिए ।

महानगर प्रमुख पराजुलीले नियमित खोपको व्यवस्थासँगै पिसिआर परीक्षण संकलनलाई समेत निरन्तरता दिइरहेको बताए ।प्रदेशको मन्त्रिपरिषद् बैठकले कोभिड व्यवस्थापन नियन्त्रण रोकथामका लागि कसले के गर्ने भन्ने विषयमा सबैलाई आ–आफ्नो जिम्मेवारी दिइएकाले काम गर्न सहज भएको उनको अनुभव छ ।

कोभिड ओमिक्रोन छिट्टैै फैलिने भएकाले यसलाई सामान्य रूपमा नलिन र स्वास्थ्य मापदण्ड अपनाउन सबैलाई आग्रह गर्दै महानगर प्रमुख पराजुलीले आगामी दिनमा ओमिक्रोनको असर धेरै बढ्न सक्ने भएकाले स्वास्थ्य सावधानी अपनाउन र अनिवार्य मास्क प्रयोग गर्न महानगरबासीलाई सुझाव दिए ।