चितवन–  सरकारसँग कोरोना भाइरस सङ्क्रमितको निःशुल्क उपचार गर्ने सम्झौता गरेको चितवन मेडिकल कलेजले कोरोना सङ्क्रमितसँग पनि पैसा लिएको पाइएको छ ।

जिल्ला प्रशासन कार्यालय चितवनले बिरामीसँग पनि पैसा लिएको भए उजुरी गर्नुस् भनी सार्वजनिक सूचना प्रकाशन गरेपछि उपचार गराएका सङ्क्रमितले उजुरी दिएका छन् । आइतबार प्रशासनले सूचना सार्वजनिक गरेपछि कोरोना सङ्क्रमितले बुधबार जिल्ला प्रशासन कार्यालयमा उजुरी दिएका हुन् ।

सरकारसँगको सम्झौताविपरीत चितवन मेडिकल कलेजले बिरामीसँग पैसा लिएको तर उनीहरूलाई निःशुल्क उपचार गरेको भनी सरकारसँग भुक्तानी दाबी गरेको थियो । तीन जनाले जिल्ला प्रशासन कार्यालयमा उजुरी दिएका छन् । उजुरी दिनेमध्ये कोरोना सङ्क्रमित भरतपुर महानगरपालिका–२० का कृष्ण भण्डारी गत जेठ २ गते चितवन मेडिकल कलेजमा भर्ना भएर असार ७ गते उपचारपछि घर गएका थिए । यो क्रममा ६ लाख ८२ हजार ७८० रुपियाँ बिल उठेको भण्डारीले बताए । त्यसमा कलेजले एक लाख रुपियाँ छुट दिएर ५ लाख ८२ हजार ७८० रुपियाँ आफूले तिरेको उनले जानकारी दिए ।

निःशुल्क उपचार गर्छु भनेर पैसा लिएपछि भण्डारीले जिल्ला प्रशासन कार्यालयमा केही हप्ताअगाडि नै जानकारी गराएका थिए तर यस विषयमा कुनै सुनुवाइ भएको थिएन । अहिले प्रशासन कार्यालयले सार्वजनिक रूपमा उजुरी दिन आह्वान गरेपछि आफूले उजुरी दर्ता गरेको उनले बताए ।

३७ दिन अस्पतालमा बस्दा भेन्टिलेटर, आईसीयू र एचडीयूमा बसेर उपचार गरिएको बताए । कुरुवाको खर्च, खाइखर्च र अन्य गरेर १२ लाख रुपियाँ सकिएको थियो । अस्पतालमा मात्रै पाँच लाख रुपियाँभन्दा धेरै तिरेको बिल आफूसँग भएको दाबी उनको छ ।

चितवन मेडिकल कलेजमा उपचार गराएकी हिमालक्ष्मी भट्टको परिवारले नौ दिनको ९० हजार रुपियाँ बुझाएको छ । बिरामीका आफन्त नारायण केसीले रकम बुझाएको तर अस्पतालले अहिले निःशुल्क उपचार गरेको भनी सरकारसँग पनि माग गरेको सुन्दा अचम्मित भएको बताए । उनी जस्तै सिरहा गोलबजार–१३ का मनोजकुमार सिंहले पनि यो कलेजमा उपचार गराउँदा एक लाख ३८ हजार छ सय रुपियाँ तिरेका छन् । निःशुल्क उपचार भने पनि पैसा तिर्नु परेको भन्दै उनले जिल्ला प्रशासन कार्यालयको इमेलमा प्रमाणसहित उजुरी दिएका छन् ।

प्रशासनले सूचना सार्वजनिक गरेपछि उजुरी दिने क्रम वृद्धि भएको जिल्ला प्रशासन कार्यालयका सूचना अधिकारी खेमराज पौडेलले जानकारी दिए । कतिपयको मौखिक उजुरी परेको छ, कतिले फेसबुकमार्फत उजुरी गर्नुभएको छ, उनले भने, ‘प्रमाण पुगेर आएका उजुरीमाथि आवश्यक अनुसन्धान हुनेछ, अझै उजुरी दिने समय बाँकी रहेकाले केही भन्न सकिँदैन ।’

अस्पतालले यसअगाडि पनि निःशुल्क उपचारको व्यवस्था भए पनि पैसा लिएको भनी निवेदन दिन आएका घटना भएको पौडेलले बताए । चितवन मेडिकल कलेज र पुरानो मेडिकल कलेजले सरकारसँग भएको सम्झौताविपरीत उपचारमा पैसा लिएको भन्दै बिरामीले गुनासो गर्दै आएका छन् ।

कोरोना सङ्क्रमितको उपचार व्यवस्थापन सम्बन्धमा सम्झौता भएका अस्पतालले गत वैशाखदेखि असार १५ गतेसम्म उपचार गरिएका बिरामीको सम्झौताबमोजिम निःशुल्क उपचार गर्ने गरी सम्झौता भएको थियो । सरकारले कोरोना सङ्क्रमितको उपचार गर्दा आइसोलेसनमा बसेको दैनिक दुई हजार, एचडीयूमा बसेको तीन हजार पाँच सय र आईसीयू तथा भेन्टिलेटरमा बसेका बिरामीको उपचारमा दैनिक १५ हजार रुपियाँ मात्रै लिन पाउने व्यवस्था गरेको थियो ।