दैलेख–जिल्ला प्रशासन कार्यालय दैलेखमा कार्यरत केही कर्मचारीलाई कोरोना संक्रमण पुष्टि भएपछि कार्यालयको नियमित कामकाज रोकिएको छ । कार्यालयमा कार्यरत ४ कर्मचारीलाई कोरोना संक्रमण देखिएपछि प्रशासनबाट प्रवाह हुने सबै प्रकारका सेवा बन्द गरिएको दैलेखका प्रमुख जिल्ला अधिकारी हरि प्याकुरेलले जानकारी दिए । 

कोरोना संक्रमण पुष्टि भएका कर्मचारी उपचाररत रहेको उनले बताए । उनका अनुसार प्रशासनमा कार्यरत अन्य कर्मचारीमा समेत कोरोना संक्रमणको लक्षण देखिएपछि परीक्षणका क्रममा रहेको, सेवाग्राहीको स्वास्थ्य सुरक्षा र संवेदनशीलतालाई दृष्टिगत गरी १७ देखि २१ माघसम्म सेवा प्रवाह बन्द गरिएको हो ।  कार्यालयका अनुसार मुद्दा, विपद् व्यवस्थापन र शान्ति–सुरक्षाका सेवा प्रवाह भने नियमित सञ्चालन हुनेछन् ।