जुम्ला–हुम्लाका सहायक प्रमुख जिल्ला अधिकारी कोरोना संक्रमित भएपछि जिल्ला प्रशासन कार्यालय एक साताका लागि सिल गरिएको छ । सहायक प्रजिअ दशरथ राईलाई कोरोना संक्रमण भएपछि प्रशासन कार्यालयका सम्पूर्ण काम बन्द गरिएको हो । 

कार्यालयमा कार्यरत कर्मचारी तथा सेवाग्राहीबीच नियमित र प्रत्यक्ष सम्पर्क हुने भएकाले एक साताका लागि प्रशासनिक सेवा बन्द गरिएको हो । जनस्वास्थ्य कार्यालय हुम्लाका प्रमुख प्रेम सिंहका अनुसार ३२ जनालाई कोरोना परीक्षण गरिएको थियो ।

यसमध्ये १० जनामा संक्रमण देखिएको थियो । १० जना संक्रमितमध्ये अहिले एक जना मात्रै सक्रिय संक्रमित छन् भने ९ जनालाई निको भइसकेको छ । लक्षण देखिएका व्यक्तिको मात्रै कोरोना परीक्षण गर्ने गरिएको उनले बताए ।