कात्तिक ०६, २०७७
ओखलढुंगा– मोलुङ गाउँपालिकाको वडा नम्बर ६ श्रीचौरदेखी ओखरबोट हुँदै खिजीदेम्वा गाउँपालिका जोड्ने सडक खुलेको छ । यो सडक खुलेसँगै खिजीदेम्वाका नागरिकलाई सदरमुकाम ओखलढुंगा आवत जावत गर्न छिमेकी जिल्ला घुम्नु पर्ने बाध्यता टरेको छ ।
यसअघि खिजीदेम्वाका सर्वसाधारण जिल्ला सदरमुकाम पुग्न छिमेकी जिल्ला कि सोलखुम्बु, कि रामेछप, सिन्धुली र उदयपुर घुम्नुपर्ने बाध्यता थियो । श्रीचौरको यलुङखोलादेखि ओखरबोट, हातेबन्से हुँदै खिजीदेम्वाको केन्द्र जोडिएको छ ।
सडक पुगेपछि अनुगमन गर्न खिजीदेम्वा र मोलुङ गाउँपालिकाका अध्यक्ष र उपाध्यक्षसहित सांसद यज्ञराज सुनुवार पुग्दा फुलमाला लिएर सयौं स्थानीय भेला भएका थिए । ‘सडक पुगेको खुसियाली साट्न आएका हौं’, खिजीदेम्वाका स्थानीय मेघराज घिमिरेले भने ।
निकै कडा चट्टान र डरलाग्दो भीर फोडेर सडक पुर्याउन स्थानीय तहले आँट गरेका थिएनन् । यस क्षेत्रका संघीय प्रतिनिधिसभाका सांसद यज्ञराज सुनुवारले निर्वाचन क्षेत्र पूर्वाधार विकासका लागि सांसदलाई दिइने बजेटबाट पटक पटक गरेर १ करोड १ लाख विनियोजन गरेका थिए । यसमा खिजीदेम्वा गाउँपालिकाले ४० लाख थपेपछि सडकको ट्रयाक खुलेको हो ।
यो सडकको झण्डै ३५ किलोमिटर चट्टान काटिएको छ । ३ सय घण्टा जति त पहरो फुटाउन ब्रेकर चलाइएको मोलुङ गाउँपालिका ६ का वडा अध्यक्ष रामकाजी तामाङले बताए ।
खिजीदेम्वा र मोलुङलाई जोड्दै आफ्नो क्षेत्रको भूभागमा सडक पुर्याउन २०७४ सालदेखि सांसद यज्ञराज सुनुवार, खिजीदेम्वा र मोलुङ गाउँपालिकाले सामुहिक प्रयास थालेका थिए । ‘यो जनप्रतिनिधिको संयुक्त प्रयासको प्रतिफल हो’, खिजीदेम्वा गाउँपालिकाका अध्यक्ष बेदबहादु रोकाले खुसी हुँदै भने ।
आगामी दिनमा पनि यसरी जनप्रतिनिधिबीचको सहकार्यले थप विकासका काम सहज रुपमा गर्न सकिने उनको बुझाइ छ ।
यो सडक लेक र बेँसी जोड्ने भएकाले लेकाली क्षेत्रका अग्र्यानिक उत्पादनले बजार पाउनेमा स्थानीय आशावादी छन् । खिजीकातिका देवकृष्ण खड्का यो सडक समृद्धिको आधारशील भएको बताउँछन् । सडकको ट्रयाक खुलेपछि यसको स्तरोन्नतिका लागि सर्भे समेत शुरु हुने भएको छ ।
सडक स्तरोन्नति गरेर यहाँ आएका गाडीमा स्थानीय उत्पादन निर्यात गर्दै कृषि क्षेत्रमा जोड्ने गाउँपालिकाको प्रयास रहने मोलुङ गाउँपालिकाका अध्यक्ष मणिराज राईले बताए ।
यो सडक खुलेसँगै खिजीदेम्वाबाट मोलुङ गाउँपालिका केन्द्र हुँदै सदरमुकाम ओखलढुंगा आइपुग्न ५ घण्टा लाग्छ । यस अघि हिडेर जाँदा दुई दिन लाग्ने गरेको थियो । सवारी साधन छिमेकी जिल्ला हुँदै मात्र चल्ने गरेका थिए ।
भदौ २७, २०८१
भदौ १८, २०८१
कात्तिक १४, २०८१
