खोटाङ– खोटाङको दिप्रुङ चुइचुम्मा गाउँपालिकाका अध्यक्ष भूपेन्द्र राईले तावा खोला पक्की पुलको काम तत्काल सुरु गर्न ठेकेदारलाई निर्देशन दिएका छन् । 

गाउँपालिका अध्यक्ष राईले महिनौंदेखि ठप्प रहेको साकेला गाउँपालिकाको वडा नम्बर ५ मात्तिम र दिप्रुङ चुइचुम्माको वडा नम्बर ७ टेम्मा जोड्ने मोटरेबल पुलको काम तत्काल सुरु गर्न ठेकेदारलाई निर्देशन दिएका हुन् ।

१८ महिनाभित्र पूरा गर्ने गरी २१ वैशाख २०७५ मा सम्झौता गरिएको ५० मिटर लम्बाइको पुलको काममा ढिलासुस्ती भएपछि गाउँपालिका अध्यक्ष राईले चासो देखाएका हुन् ।

गाउँपालिका अध्यक्ष राईले नेसनल महावीर सिद्धिसाई जेभी पुरानो बानेश्वर, काठमाडौंका प्रतिनिधि कर्ण खत्रीलाई निर्माण स्थलमै बोलाएर पुलको अवरुद्ध काम सुचारु गर्न निर्देशन दिएको बताए । 

‘पुल निर्माणमा जता हे¥यो भताभुंग र ढिलासुस्ती मात्र देखिन्छ । शरीर तातेर सीमा नाघ्न खोजे पनि सम्हालिन बाध्य छु,’ गाउँपालिका अध्यक्ष राईले फेसबुकमा लेखेका छन्, ‘निर्माण व्यवसायी कर्ण खत्रीलाई निर्माण स्थलमा बोलाएर स्थगित पुल तत्काल थाल्न र समयसीमाभित्र निर्माण गर्न निर्देशन दिएको छु ।’ 

स्थानीय पूर्वाधार विभाग (डोली) को ४ करोड ५१ लाख ३५ हजार रुपैयाँमा पूरा गर्ने गरी पुलको काम नेसनल महावीर सिद्धिसाई जेभीले लिएको हो । पुल निर्माणका लागि निर्माण कम्पनीले ३१ असार २०७५ मा ४० लाख रुपैयाँ पेस्की लिइसकेको छ ।

तर, २०७६ कात्तिकमा सम्पन्न हुनुपर्ने पुलको म्याद नाघेको १ वर्ष ६ महिना बितिसकेको छ । हालसम्म खोलाको किनारमा पुलको पिलर उठाउने काम मात्र भएको छ । ४ फागुनमा निर्माण स्थलमै बोलाइएका निर्माण व्यवसायी खत्रीले आगामी जेठसम्म पुलको काम पूरा गर्ने प्रतिवद्धता जनाएका छन् । जिल्लाकै विकास निर्माणमा प्रत्यक्ष सरोकार राख्ने पुल निर्माण सुस्त देखिएको गाउँपालिकाका अध्यक्ष राईले
बताए ।

निर्माण कम्पनीले सम्झौता म्याद गुज्रेको वर्ष दिनपछि पुलको जग खन्नेलगायतका सामान्य काम थालेको थियो । दिक्तेल–खोटाङ बजार सडक खण्डमा पर्ने तावा खोला पुल निर्माणका लागि ठेक्का लागेको वर्ष दिन ढिला गरेर निर्माण कम्पनी र तत्कालीन जिल्ला प्राविधिक कार्यालयबीच सम्झौता गरिएको थियो । पुलको सम्झौतामा ढिलाइ र त्यसमाथि निर्माणकै काममा ढिलासुस्ती देखिएको साकेला गाउँपालिकाका अध्यक्ष अर्जुन खड्काले बताए ।

३ तहको सरकार कार्यान्वयनमा आउनुअघि साविकको प्राविधिक कार्यालयमार्फत बजेट आए पनि सो कार्यालय खारेज भएपछि हाल प्रदेश सरकारअन्तर्गत पूर्वाधार विकास कार्यालय उदयपुरबाट बजेट परिचालनको व्यवस्था मिलाइएको छ ।

तावा खोलामा पुल नहुँदा ४ वैशाख २०७५ मा खोलामा आएको बाढीले पञ्चमी बजारबाट यात्रु लिएर दिक्तेल जाँदै गरेको बा २ ख ४८९६ नम्बरको बस बगाएको थियो । 

बाढीले पुलको डिजाइनै परिवर्तन 

मात्तिम–टेम्मा जोड्ने तावा खोला पुलको डिजाइन दोस्रो पटक फेरिएको हो । सुरुमा २५ मिटरको पक्की पुल निर्माणका लागि डिजाइन गरिए पनि काम सुरु नहुँदै १९ असार २०७२ मा आएको बाढीले खोलाको चौडाइ बढाएपछि पुलको डिजाइन परिवर्तन गरिएको हो ।

सो बाढीले सडकको झन्डै १ सय १० मिटर खण्ड बगाएको थियो भने खोलामा ठूला–ठूला ढुंगा थुप्रिएका कारण लामो समयसम्म सवारी साधन आउजाउ ठप्प भएको थियो ।