जुम्ला– जुम्लाका स्थानीय तहका प्रशासनिक केन्द्रका भवन निर्माण कार्य तीव्रगतिमा भएका छन् । आठ वटै स्थानीय तहले सो कामलाई अगाडि बढाएका छन् । 

तिला गाउँपालिकाले प्रशासनिक केन्द्रको भवन निर्माण कार्यलाई तीव्र बनाएको छ । आउदो दशैँसम्म आफ्नै भवनमा सर्ने गरी निर्माण कार्यलाई तीव्र बनाएको हो । तिलाको डुण्डेलीमा निर्माणाधीन अवस्थामा रहेको भवनको निर्माण कार्य झण्डै ६० प्रतिशत भन्दा बढी सम्पन्न भइसकेको छ । नमूना र भूकम्प प्रतिरोधि भवन निर्माण कार्य जारी रहेको गाउँपालिका अध्यक्ष रतननाथ योगीले बताए ।

उनले भने, ‘आउँदो दशैँसम्म गाउँपालिकाको आफ्नै भवन निर्माण भई कार्य सञ्चालनमा आउने छ । भवन निर्माणको जिम्मेवारी पाएको निर्माण व्यवसायीलाई दशैँ अगावै भवन निर्माण गरिसक्न जानकारी गराएको छ ।’ दशैँपछि गाउँपालिकाले आफ्नै भवनबाट सेवा प्रवाह गर्न सक्नेछ । गाउँपालिकाको प्रशासनिक केन्द्र महत्वपूर्ण भएकाले आफ्नै पालामा भवन निर्माण भइसक्ने अध्यक्ष योगीले बताए । 

     
जिल्लाको एक मात्र चन्दननाथ नगरपालिकाले पनि आफ्नो प्रशासनिक केन्द्रको भवन निर्माण कार्य अन्तिम चरणमा पुगेको जनाएको छ । स्थानीय सरकारले आफ्नै भवन निर्माण गर्न लागेको हुनाले नागरिकलाई सेवा प्रवाहमा सहज हुने स्थानीय तहका प्रमुख बताउँछन् ।

भाडाको घरबाट सेवा दिन असजिलो भएको भन्दै अब आफ्नै प्रशासनिक केन्द्रको भवन निर्माण पश्चत निकै सजिलो हुने सिञ्जा गाउँपालिकाका अध्यक्ष देवलसिंह रावलले बताए । कनकासुन्दरी र हिमा गाउँपालिकाले अझै प्रशासनिक केन्द्रको टुंगो लगाउन सकेका छैन् । सिञ्जा गाउँपालिकाले प्रशासनिक केन्द्रको भवन निर्माण कार्य सुरु गरिसकेको छ ।

 गुठीचौर, तातोपानी र पातारासी गाउँपालिकाले प्रशासनिक केन्द्रको टुंगो लगाए पनि भवन निर्माण कार्य थालेका छैनन् ।