बागलुङ– बागलुङ बजार हुँदै सिगाना, चापाखर्कबाट बरेङ जोड्ने सडक तीन वर्षमा कालोपत्रे गर्ने तयारी थालिएको थियो । विस्तृत आयोजना प्रतिवेदन (डिपिआर) सकेर बोलपत्र प्रक्रियाको अनुमति लिन मात्रै बाँकी रहेको सो सडक खण्डकोे बजेट अहिले कटौती भएको छ । 

जंगल क्षेत्र नभएको केही स्थानमा पक्की नाली र ८ मिटर चौडा गरी सिगानाको बौडचौरसम्मको १० किलोमिटर सडक ४० लाख रुपैयाँमा कालोपत्रे गर्ने गरी डिभिजन सडक कार्यालय बागलुङले तयारी थालेको थियो । उक्त सडकसँगै पछिल्लो समय बागलुङ क्षेत्र १ का मात्रै १७ सडकको योजना र बजेट कटौती भएको बताइएको छ । 

प्रतिस्थापन बजेट आएसँगै धौलागिरिका चार जिल्लाका ५५ सडक कटौती भएको डिभिजन सडक कार्यालयले जनाएको छ । उक्त सडकमध्ये केही निर्माणका चरणमा प्रवेश गरिसकेका थिए ।

यस क्षेत्रका स्थानीय बजेट कटौतीपछि निरास बनेको बागलुङ नगरपालिका वडा नम्बर ८ सिगानाका वडाध्यक्ष राजन जिसीले जानकारी दिए । ‘अहिले सडक र बजेट दुवै कटौती भयो । नयाँ योजना र नयाँ नीति आउला तर विकासमा भने केही वर्ष पछि पर्ने भयो’, उनले भने, ‘राजनीतिक दलको सरकार परिवर्तन भए पनि विकासे काम भने निरन्तर हुनुपर्ने थियो । यो दुर्भाग्य भयो । सरकार परिवर्तनसँगै विकास निर्माण प्रभावित हुनुहुँदैन ।’

बागलुङेका लागि निरन्तर रूपमा पहलकदमी गरी १७ सडक छनोमा पारेर केही परिणामसमेत दिइसकेको अवस्थामा सडक कटौती भएको बागलुङ क्षेत्र १ का सांसद डा. सूर्य पाठकले बताए ।

‘राजनीति परिवर्तनशील छ । सरकारसमेत स्थिर नभएको अवस्था छँदै थियो तर विकासे योजना जुन रातो किताबमा समावेश भएका बहुवर्षे योजना थिए, ती निरन्तर हुनुपर्दथ्यो’, उनले भने, ‘उक्त सडक निकै सोच, विचार र नागरिकको जीवनस्तर उकास्नेसँग जोडिएका थिए । तर, अहिले कटौती भएको छ । पुनः योजना आउला तर विकास निर्माण पछि धकेलियो ।’

क्षेत्र १ अन्तर्गत संघीय सरकारको भौतिक पूर्वाधार मन्त्रालयको रातो किताबमा सूचीकृत बागलुङ–मालढुंगा बलेवा–कुश्मीसेरा सडक (बरेङ–गुल्मी–शान्तिपुर), बागलुङ बजार सिगाना चापाखर्क गौजाको दह बरेङ सडक, मालढुंगा पैयापटा–लहरेबर अमलाचौर हुँदै कुश्मीसेरा सडक, भीमापोखरा अक्षतेबाट सलाम–मलठाना सिम म्याग्दी जोड्ने पयर्टकीय सडक हटाइएको छ । 

यस्तै, मालढुंगा–बलेवा–कुश्मीशेरा–बरेङ–शान्तिपर गुल्मी सडक, खरज्र्याङ–दरबार– गौडाकोट–जुभुङ मुजुवा–शान्तिपुर–हुग्दीशिर बागलुङ, गलुवा, द्वार भकुण्डे डोठे ताल, रामतोला रायडाँडा फेदी कुश्मीशेरा जैमिनी सडक कटौतीमा परेका छन् ।

यस्तै, भैरवस्थान–कामीचौतारा–सतिपोखरा–ढकालथोक सम्माचौर करिडोर सडक, काठेखोला गाउँपालिका भीमपोखरा–सिम सायकोट ओखले हुँदै म्याग्दी भकिम्ली कालोपत्रे गर्ने सडक, काठेखोला भीम पोखरा सिम सायकटेरा खोख्ले भकिम्ली सडक पनि कटौतीमा परेको छ ।

भांगी–तारीखेत पुरानो गाउँ गहुँखेत सडक, कालीगण्डकी करिडोर भुनेवा वडा कार्यालय भड्कुवा खोलाखानी मोटर बाटो, बुकेनी–मनकामना–दिहिडाँडा गैडाफाँट सिम्स्वारा बोडेचौर सडक, बाग्लुङ मालढुंगा गणेश घुम्ती म्याग्दी जोड्ने सडक, बडारचौर ढाडेनी सडक, बागलुङ तित्याङ निफन्नी भकुण्डे भ्यूटावर रायडाँडा सडक सिमलपाटाबाट निफन्नीसम्म स्तरोन्नतिलगायतका सडक कटौती गरिएको छ । 

साविक धौलागिरिका पर्वत, म्याग्दी, बागलुङ र मुस्ताङका सडक हेर्दै आएको सडक डिभिजन कार्यालयका इञ्जिनियर सुरेन्द्र गौतमले कार्यालयअन्तर्गतका ५५ सडक कटौती भएको बताए । 

‘अहिलेलाई सडक कटौती भएको मात्रै अवगत भयो । पुनः के व्यवस्था आउँछ अहिले भन्न सकिन्न’, उनले भने, ‘साना सडक आयोजना स्थानीय तहमार्फत सम्पन्न गर्न कटौती भएको होला । सडकले ठूला आयोजना मात्रै हेर्ने नीति आएर हो वा के कारणले अब केही दिनमा जानकारी होला ।’