कात्तिक ०५, २०७८
खोटाङ– खोटाङको दिक्तेल रुपाकोट मझुवागढी नगरपालिका वडा नम्बर १४ बुइपामा प्रथम किराती राजा यलम्बर हाङको १०० फिट अग्लो शालिक शिलान्यास गरिएको छ ।
आन्तरिक पर्यटन प्रवद्र्धनका लागि दिक्तेल रुपाकोट मझुवागढी नगरपालिकाको ३० प्रतिशत र प्रदेश १ सरकारको ७० प्रतिशत गरी १४ करोड रुपैयाँको लागत सहभागितामा पूरा गर्ने गरी बुइपाको पञ्चरदोबाटोमा प्रथम किराती राजा यलम्बर हाङको शालिक तथा यलम्बर पार्क शिलान्यास गरिएको हो ।
नछुङ धनीराम नछुङले मुन्धुमी विधिअनुसार माङी गरेपछि दिक्तेल रुपाकोट मझुवागढीका नगरप्रमुख दीपनारायण रिजाल र उपप्रमुख वीणादेवी राईले प्रथम किराती राजा यलम्बर हाङको शालिक तथा यलम्बार पार्क शिलान्यास गरे ।
दिक्तेल र उदयपुरको गाईघाट जोड्ने महुरे–फोक्सिङटार सडकले छोएको पञ्चरदोबाटोमा रहेको करिब ३० रोपनी सार्वजनिक जग्गाभित्र चोभारको मञ्जुश्रीपार्कको शैलीमा यलम्बर हाङको शालिक तथा यलम्बर पार्क निर्माण सुरु गरिएको हो ।
किराती पुर्खाको सम्मान तथा धार्मिक, पर्यटन क्षेत्रलाई विकास गर्ने उद्देश्यले यलम्बर हाङको शालिक निर्माण गरिएको नगरप्रमुख रिजालले बताए । रिजालले भने, ‘नगरपालिकामा मात्र नभएर यलम्बर पार्कले जिल्लाकै पर्यटन प्रवद्र्धनमा सघाउ पुग्ने विश्वास छ ।’
पञ्चरदोबाटोमा पार्कसहितको यलम्बर हाङको शालिक राख्न २०७५ असोजमा सर्भे गरिएको थियो । यलम्बर हाङको शालिक तथा यलम्बर पार्क निर्माणको ठेक्का उमा–तुवाचुङ–अनसुवी जेभीले लिएको छ ।
आगामी १८ महिनाभित्र यलम्बार पार्क तथा यलम्बरको शालिक राख्ने काम पूरा हुनेछ । यलम्बर हाङको शालिक तथा यलम्बार पार्क निर्माणका क्रममा हालसम्म १ करोड ५० लाख रुपैयाँ खर्च भइसकेको छ ।
शालिकसहितको पार्क बनेपछि बजार प्रवद्र्धनमा समेत टेवा पुग्नुका साथै किराँतीहरूको धर्म–संस्कारको अध्यनन् केन्द्र तथा अनुसन्धान स्थल बन्ने विश्वास किरात योयाख्खाका केन्द्रीय कोषाध्यक्ष देवन राईले व्यक्त गरे ।
२०७६ देखि यलम्बर पार्कको काम थालेको निर्माण कम्पनीले २०७८ असारमा यलम्बरको शालिक निर्माणका लागि सम्झौता गरेको हो । पार्कअन्तर्गत हालसम्म गेट, बाटो, कफीसप, रेस्टुरेन्टलगायत संरचना बनिसकेको छ ।
यलम्बर पार्कमा घुमफिर गर्ने ठाउँ, विश्राम गर्ने फलामे कुर्सी, फ्री–वाईफाई, कफी तथा फास्टफुडलगायत आधुनिक सेवा–सुविधासहितको संरचना निर्माण गरिने डिपिआरमा उल्लेख छ ।
प्रवेश शुल्कबापत संकलन हुने रकमको ६० प्रतिशत नगरपालिका र ४० प्रतिशत रकम प्रदेश सरकारको कोषमा जम्मा हुने गरी यलम्बर हाङको शालिक तथा यलम्बार पार्क निर्माणको काम अघि बढाइएको हो ।
पछिल्लो समय बजारको रूपमा विकास हुँदै गएको बुइपामा किराँती समुदायका पहिलो राजा यलम्बर हाङको १०० फिटको शालिकसहितको पार्क निर्माण हुने भएपछि स्थानीय खुसी छन् ।
भदौ २७, २०८१
भदौ १८, २०८१
कात्तिक १४, २०८१
