झापा–गुणस्तरहीन सडक निर्माण गरेको दाबीसहित झापाको बिर्तामोड नगरपालिकाका नगरप्रमुख ध्रुवकुमार शिवाकोटीले कालोपत्रे सडक भत्काएका छन् । मापदण्डविपरीत सडक निर्माण भएको भन्दै वडा नम्बर ८ को प्रगतिनगर–शंखरवाडी टोल जाने कालोपत्रे सडक डोजर लगाएर भत्काइएको नगरप्रमुख शिवाकोटीले बताए ।

नगरपालिकाका इन्जिनियर, प्राविधिकसहित निर्माणाधीन कालोपत्रे सडकको अनुगमनका लागि पुगेका नगरप्रमुख शिवाकोटीले निर्माण व्यवसायीले कमसल सामग्री प्रयोग गरी गुणस्तरहीन कालोपत्रे सडक बनाएको भन्दै सडक भत्काउनुपरेको दाबी गरे । 

उनले भने, ‘सम्झौता विपरीत गुणस्तरहीन सडक बनाउने छुट कुनै ठेकेदारलाई छैन । ठेकेदार कम्पनीले सम्झौताअनुसार सडक बनाउनुपर्छ ।’

२५० मिटर लम्बाइ, २० फुट चौडाइको कालोपत्रे सडकको ठेक्का इलामको सिद्धिथुम्का निर्माण सेवा प्रालिले १३ लाख ८५ हजार ३ सय १२ रुपैयाँमा लिएको थियो । नगरपालिकाले निर्माण कम्पनीसँग २ असारमा सडक निर्माणको सम्झौता गरेको थियो ।

ठेक्का सम्झौताअनुसार २ असार ०७९ सम्म सडक निर्माण सम्पन्न गर्नुपर्ने थियो । नगरप्रमुख शिवाकोटीले शुक्रबार डोजर लगाएर भत्काउन निर्देशन दिएपछि स्थानीय खुसी भएका छन् ।