ताप्लेजुङ- ताप्लेजुङको सिरिजंगा गाउँपालिकाका टोल विकास संस्थाहरु आर्थिक मामिलामा अनुशासित, मितव्ययी र इमान्दार देखिन थालेका छन् । उपभोक्ता समितिकै रुपमा काम गर्ने वैधानिक जिम्मेवारी पाएका टोल विकास संस्थाले सम्झौता अनुसारको काम सम्पन्न गरी बचत भएको रकम अनुदान लिएको निकायलाई नै फिर्तासमेत गरेर आफूलाई अनुशासित, मितव्ययी र इमान्दार पुष्टी गरेका हुन् ।

सिरिजंगा गाउँपालिका वडा नम्बर १ मा रहेको पाथीभरा टोल विकास संस्थाले सम्झौता अनुसारको कार्य सम्पन्न गरी बचत भएको १ लाख रुपैयाँ गाउँपालिकालाई फिर्ता गरेको छ । गाउँपालिकाका प्रमुख प्रशासकीय अधिकृत सन्तोष घिमिरेका अनुसार यो टोल विकास संस्थालाई बाँसको मुढा उत्पादन तालिम कार्यक्रम सञ्चालनका लागि गाउँपालिकाले २ लाख २५ हजार रुपैयाँ अनुदान उपलब्ध गराएको थियो । सो अनुदान रकमबाट १५ जना स्थानीयले २० दिनसम्म मुढा उत्पादन तालिम लिएका थिए । 

सम्झौता अनुसारको तालिम सम्पन्न हुँदा १ लाख २५ हजार रुपैयाँ मात्र खर्च भएपछि बचत भएको १ लाख रुपैयाँ टोल विकास संस्थाले गाउँपालिकालाई नै फिर्ता गरेकाे प्रमुख प्रशासकीय अधिकृत घिमिरेले बताए । टोल विकास संस्थाका अध्यक्ष हरि उप्रेतीले तालिम सञ्चालनको क्रममा सम्झौता अनुसारको पुरै रकम खर्च नभएकोले बचेको रकम आफूहरुले पालिकालाई नै फिर्ता गरेको जानकारी दिए । 

तालिमका क्रममा ३० थान मुढा उत्पादन भएको थियो । यहिँ उत्पादन मध्ये टोल विकास संस्थाले ५ थान मुढा उपहार स्वरुप पालिकालाई दिएको छ । 

अधिकांस क्षेत्रमा उपभोक्ता समितिले सम्झौता भएको रकम बराबर नै खर्च भएको वा कुनै स्थानमा रकम अपुग भएको आर्थिक विवरण अनुदान लिने निकायमा पेश गर्छन् । तर उपभोक्ता समितिकै रुपमा काम गरेको सिरिजंगा वडा नम्बर १ सिनामको पाथीभरा टोल विकास संस्थाले भने सम्झौता अनुसारको काम सम्पन्न गरी बचत भएको रकम अनुदान लिएको निकाय गाउँपालिकालाई नै फिर्ता गरेर उदाहरणीय बनेको छ ।