भदौ १७, २०७८
ताप्लेजुङ– जिल्ला समन्वय समिति ताप्लेजुङका प्रमुख घनेन्द्र मादेनले स्थानीय तहहरूले जिल्ला समीक्षा बैठकलाई महत्त्व नदिएको बताएका छन् ।
बैठकमा जानैपर्दैन भन्ने मनसायले स्थानीय तहहरूले जिससको महत्त्व घटाएको गुनासो गरे ।
जिल्ला समन्वय समिति ताप्लेजुङले बिहीबारबाट सुरु गरेको आर्थिक वर्ष २०७७/७८ को वार्षिक समीक्षा कार्यक्रममा अधिकांश स्थानीय तहका प्रमुख, अध्यक्ष, उपाध्यक्षको अनुपस्थिति देखेपछि समन्वय प्रमुख मादेनले वार्षिक समिक्षा बैठकको महत्त्वलाई कम नआँक्न स्थानीय तहलाई सुझाए ।
‘यो समीक्षा गर्ने साझा मञ्च भएकाले यही मञ्चबाट हामीले गत वर्षका कार्यक्रम र गतिविधिको समीक्षा र आगामी वर्षको कार्यक्रमका लागि मार्गदर्शन प्राप्त गर्नेछौँ,’ समन्वय समिति प्रमुख मादेनले भने ।
उनले कांग्रेसको जिल्ला अधिवेशनका कार्यक्रमका कारण पनि केही पालिकाका पदाधिकारी उपस्थित हुन कठिनाइ भए पनि उपाध्यक्ष, प्रमुख प्रशासकीय अधिकृतसहितको टोली आउन सक्ने अवस्था रहेको बताए ।
‘केही कमजोरी हाम्रो पनि भयो, तर अधिवेशनको मितिमा भइरहने फेरबदलका कारण पनि यस्तो समस्या परेको हुन सक्छ,’ उनले भने । ताप्लेजुङमा १८ भदौमा कांग्रेसको वडागत अधिवेशन हुँदै छ । यहाँका ९ स्थानीय तहमध्ये सिरिजंगा गाउँपालिका अध्यक्ष र उपाध्यक्ष क्रमशः टीकाराम गुरुङ र ज्ञानमाया चौहान, सिदिङ्वाका अध्यक्ष नरबहादुर कडरिया, आठराई त्रिवेणीका अध्यक्ष विश्वनाथ सिटौला र मेरिङ्देन गाउँपालिकामा अध्यक्षमा गणेशबहादुर लिम्बू कांग्रेसबाट निर्वाचित हुन् ।
यस्तै, मिक्वाखोला गाउँपालिका उपाध्यक्ष कांग्रेसकी रुद्रकुमारी साँवाले जितेकी थिइन् । वार्षिक समीक्षा बैठकको पहिलो दिन एमालेबाट जितेका सबै प्रमुख, अध्यक्ष, उपाध्यक्षसमेत बैठकमा देखिएनन् ।
अध्यक्ष र उपाध्यक्ष दुवै पद जितेको पाथीभरा याङ्बरक, फक्ताङ्लुङ र मैवाखोला गाउँपालिकामध्ये पाथीभरा याङ्बरकका पालिका अध्यक्ष केशरकुमार सुब्बा, उपाध्यक्ष रनमाया गुरुङ र आठराई त्रिवेणीका उपाध्यक्ष मञ्जु पौडेल भट्टराई मात्र सहभागी छन् ।
पाथीभरा याङ्बरक गाउँपालिका प्रमुख प्रशासकीय अधिकृत प्रमोदकुमार चौधरी आफैं उपस्थित भएका छन् भने अरू पालिकाले प्रतिनिधि पठाएका छन् ।
समीक्षा बैठकमा फुङ्लिङ नगरप्रमुख छत्रपति प्याकुरेल, फक्ताङ्लुङ गाउँपालिका अध्यक्ष सरोज एभेङ, उपाध्यक्ष फूलमाया लिम्बू, मैवाखोला गाउँपालिका अध्यक्ष राजनकुमार थत्लुङ र उपाध्यक्ष कौशिला थत्लुङ, मिक्वाखोलाका अध्यक्ष रामकुमार सुब्बा र मेरिङ्देनका उपाध्यक्ष कल्पना तुम्बाहाम्फे पनि सहभागी भएनन् ।
फुङ्लिङ नगर उपप्रमुख बमबहादुर भट्टराई समीक्षा बैठकमा सहभागी भए भने सिदिङ्वाका उपाध्यक्ष जीवन ताम्लिङ वार्षिक समीक्षा बैठकको पहिलो दिन देखिएनन् ।
भट्टराई र ताम्लिङ माओवादी केन्द्रबाट निर्वाचित हुन् । ताप्लेजुङमा बुधबारबाट अविरल वर्षा भइरहेको र कच्ची सडक आवागमनमा भइरहेकोे कठिनाइका कारण पनि समीक्षा बैठकमा सहभागी अपेक्षाकृत उपस्थित हुन कठिनाइ भएको हो ।
नागरिकको जीवनस्तर उठाउन कुनै सम्झौता हुँदैन
प्रदेश १ का सामाजिक विकासमन्त्री बलबहादुर साम्सोहाङले सरकार परिवर्तन संसदीय प्रणालीमा सामान्य कुरा भएको बताउँदै नागरिकको जीवनस्तर उठाउन कुनै सम्झौता नहुने बताएका छन् ।
जिल्ला समन्वय समितिले आयाजना गरेको वार्षिक समीक्षा बैठकलाई प्रमुख अथितिको रूपमा सम्बोधन गर्दै उनले भ्रष्टाचार गर्ने र भ्रष्टाचारीको संरक्षण गर्ने देश नेपाल भनेर आउने गरेको प्रतिवेदनले गिज्याउने गरेको सुनाए ।
‘अहिले अधिकांश मान्छेको मानसिकतामा कर्मचारी र जनप्रतिनिधिले आर्थिक अनुशासन कायम राख्न नसकेको आरोप लाग्ने गरेको छ,’ उनले भने, ‘यो आरोप हामीले आर्थिक अनुशासन, मितव्ययीता र सदाचारपूर्ण कामबाट खण्डन गर्नुपर्छ’ ।
वार्षिक समीक्षाले विगतका समस्या समाधान र आगामी यात्राको मार्गनिर्देश गर्ने भएकाले सकारात्मक कार्यको रूपमा लिनुपर्ने उनले बताए । कार्यक्रममा प्रदेशसभा सदस्य होमकुमारी साँवा, प्रमुख जिल्ला अधिकारी उमेश पाण्डेलगायतले समीक्षा बैठक सफलताको शुभकामना दिए । जिल्ला समन्वय अधिकारी आत्मराम सत्यालका अनुसार वार्षिक समीक्षा बैठक शुक्रबारसम्म चल्नेछ ।
चैत २४, २०८०
चैत १३, २०८०
बैशाख ०७, २०८१
बैशाख ०७, २०८१
बैशाख ०७, २०८१
बैशाख २४, २०८१
बैशाख १९, २०८१
