ललितपुर– कोरोनाको लक्षण नदेखिएका संक्रमित घरमै बसेर स्वास्थ्यलाभ गरिरहेका छन् । समिति संक्रमित देखिदा एम्बुलेन्स लिएर संक्रमितका घरघरै पुग्ने स्वास्थ्य मन्त्रालय अहिले ‘साध्य नलागेको’ भन्दै घरमै उपचार गराउन भनिरहेको छ । 

संक्रमितलाई ढाडस दिने कोहीपनि नभएका बेला ललितपुर महानगरपालिकाका प्रमुख, उपप्रमुखलगायतको टोली भने यतिवेला संक्रमितको घरघरमै पुगेर स्वास्थलाभको कामना गर्न थालेको छ । 

ललितपुर महानगरपालिकाका प्रमुख चिरीबाबु महर्जन बुधबार बिहानै हरिसिद्धि पुगे । साथमा थिए्, महानगरका उपप्रमुख गीता सत्याल, प्रमुख प्रशासकीय अधिकृत विष्णु प्रसाद कोइराला, ललितपुर महानगरपालिका कोभिड फोकल पर्सन देवी गुरुङ र केस इन्भेटिगेसन कन्ट्याक ट्रेसिङ (सिआइसिटी)को समूह । 

हरिसिद्धीमा कुनै सभा, सम्मेलन , शिलान्यास, उद्घाटन केही थिएन । नगरप्रमुख सहितको त्यो समूह त्यहाँ कोभिड संक्रमणका कारण होम आइसोलेसनमा बसेकी युवतीलाई हौसला बढाउन पुगेका थियो । त्यहि क्रममा युनिसेफले उपलब्ध गराएको डिग्निटी किटमा महानगरपालिकाले केही सामग्री थपेर संक्रमितलाई प्रदान गरेको गर्यो । 

मास्क, पन्जा लगाएका प्रमुख महर्जनले किट दिदैं भने, ‘ म यहाँको स्वास्थ्य लाभको कामना गर्न आएको हुँ , आराम गर्नुस्, अप्ठ्यारो पर्दा महानगर यहाँ र यहाँको परिवारलाई सहयोग गर्न तत्पर छ ।’ घरको आँगनमा उभिएका उनले संक्रमितको परिवारको कुरा ध्यान दिएर सुने । चिकित्सक र स्वास्थ्यकर्मीले सुझाएको स्वास्थ्य सर्तकता अपनाउन अनुरोध गरे । उक्त किटमा महानगरले सिटामोल र जीवनजल थपेर संक्रमितलाई दिएको थियो । 

उपप्रमुख गीता सत्यालले सन्त्वना दिदैं भनिन्, ‘आत्मबल बढाउनुस् , तपाई छिट्टै निको हुनुहुनेछ ।’ संक्रमितको कुरा ध्यान दिएर सुनेकी उनले कोभिडसँग लड्न आत्मविश्वास र सतर्कता आवश्यक भएकोे बताइन् । वडा २८ का वडा अध्यक्ष राजेश महर्जनले होम आइसोलेसनमा बसेकी युवतीलाई हौसला प्रदान गरे । 

प्रमुख प्रशासकीय अधिकृत विष्णुप्रसाद कोइरालाले स्वास्थ्यलाभको कामना गरे । उनले छिटो निको भएर महानगरपालिका आउन अनुरोध समेत गरे । 

कोभिड संक्रमितका लाथि थप पोषण आवश्यक पर्ने भएकाले उक्त किटमा पोषण युक्त पीठो थप्ने महानगरपालिकाले जनाएको छ । उक्त पीडो नेपाल युथ फाउण्डेसनले उपलब्ध गराउन लागेको हो । महानगरपालिकाका अनुसार महानगरभित्र तीन सय जना संक्रमित होम आइसोलेसनमा छन् । 

१ असोजदेखि संक्रमण देखिएकालाई डिगनिटी किट दिइएको हो । किट प्रदानको सुरुवात प्रमुख र उपप्रमुखबाट गरिएको उल्लेख गर्दै  अन्य संक्रमितलाई वडा मार्फत महानगरले जनाएको छ । उक्त किटमा स्यानिटाइजर, पानी शुद्धिकरण गर्ने औषधि पियु्स, भाडा माँझ्ने साबुन, मास्क, थर्मोमिटर छन् । महिलालाई दिइने किटमा भने स्यानिटरी प्याड राखिएको छ ।