ओखलढुंगा–  शुक्रबार कार्यालयका कर्मचारी कमल धमला सधैँ भीडभाड  हुने नेपाल कम्युनिस्ट पार्टीको जिल्ला कार्यालय बन्द गरेर घर गए । शनिबार नेकपाको कार्यालय खुल्दैन थियो । आइतबार आउँदा कार्यालयमा आफूले लगाएको तालामाथि चेनसहितको अर्को भोटे ताल्चा झुण्डिएको देखे ।

आइतबार बिहानै ओली खेमाका भनेर चिनाउने दुई–तीन जना युवाहरू आएर कार्यालयमा ताला लगाएको प्रत्यक्षदर्शीले बताए । उनीहरूका अनुसार ताला लगाएर उनीहरूले कसैले खोलेमा नराम्रो हुने चेतावनीको भाषामा आपसी कुरा गरेका थिए ।  

अहिले झडप हुने अवस्था आएको देखेपछि स्थानीय प्रशासनले त्यहाँ प्रहरी परिचालन गरेको छ । पार्टी कार्यालय अगाडि नेता, कार्यकर्ता होइन, प्रहरी देखिन्छन् ।

उता, कांग्रेस कार्यालयमा भने दैनिक रूपमा चहलपहल बढेको छ । प्रायः सुनसान हुने कार्यालयमा नेताहरूको भीडभाड छ । संसद विघटन, निर्वाचनलगायतका विषयमा नेताहरू छलफलमै व्यस्त हुन्छन् । सत्तारुढ नेकपा विधिवत विभाजन भएर एक अर्को खेमाका फरकफरक गतिविधि गर्ने, एक अर्को खेमालाई निषेध गर्ने अभ्यासमा छन् ।

नेकपा कार्यालयको तालाबन्दीले जिल्लामा बहस ल्याएको छ । यो कार्यालय साविक नेकपा एमाले जिल्ला कमिटीले निर्माण गरे पनि पुष्पलाल स्मृति प्रतिष्ठानका नाममा छ । प्रतिष्ठानमा हाल नेकपाकै नेताहरू छन् । प्रतिष्ठानका पदाधिकारी प्रचण्ड–नेपाल खेमामा छन् ।

अध्यक्ष यज्ञराज सुनुवार माधव नेपाल निटक केन्द्रीय सदस्य हुन् । अन्य पदाधिकारीसमेत नेपाल खेमामा छन्, केही खुलेका छैनन् । कम्युनिस्ट आन्दोलनका संस्थापक नेताको स्मृतिमा गठित संस्थालाई पार्टीको गुट र फुटको निशानामा पार्नु कम्युनिस्ट आन्दोलनमाथिको गद्दारी हुने प्रतिष्ठानका उपाध्यक्ष नेत्र भट्टराई बताउँछन् । उनी दुवै पक्षमा नखुली फुटको विरोधमा छन् ।

जनप्रतिनिधिलाई बजेट कतौती हुने चिन्ता

जिल्लाका कांग्रेसबाट निर्वाचित जनप्रतिनिधि भने निर्वाचन घोषणाले विकास बजेट कटौती हुने चिन्तामा छन् । ‘हामीले गरेका प्रतिबद्धता पूरा गर्न समस्या आउने र विकास पछि पर्ने देखेको छु’, कांग्रेसबाट निर्वाचित सिद्धिचरण नगरपालिका– ११ का वडा अध्यक्ष विनोद केसीले भने । नेकपाको विभाजित राजनीति वडासम्मै मुठभेडमा पुग्ने हुँदा जिल्लाको विकासलाई समेत प्रभावित पार्नेमा जनप्रतिनिधिहरूको चिन्ता छ ।    

यसअघि नेकपाबाटै जिल्लाका चार स्थानीय तह तथा संघ र प्रदेशको निर्वाचनमा पराजित कांग्रेसका कार्यकर्ता भने नेकपा विभाजनबाट कांग्रेसले निर्वाचन जित्ने आँकलन गरेर उत्साहित छन् । नेताहरू भने संसद विघटन लोकतन्त्रमाथिको कू भनेर विरोधमा छन् ।

जिल्ला सचिव तथा सुनकोसी गाउँपालिका अध्यक्ष रुद्रप्रसाद अधिकारी प्रधानमन्त्रीको कदमलाई दुर्भाग्यपूर्ण कदम भन्छन् । उनले भने, ‘यसले देश विकास पछि धकेलिन्छ ।’

नेता, कार्यकर्ता तान्ने होडबाजी

विभाजित नेकपाका दुई खेमा आफ्नो पक्षमा कार्यकर्ता तान्ने कसरतमा छन् । ओली खेमाले पाँच जना नेताहरूलाई महाधिवेशन आयोजक समितिमा मनोनीत गरेपछि नेपाल–प्रचण्ड खेमाका नेता गाउँमा पुगेर नेकपाको भावी रणनीति र आधिकारिकताबारे छलफल गरेका छन् । तानातानमा केही नेता, कार्यकर्ता आधिकारिकतालाई पर्खेर तटस्थ बसेका छन् ।

धेरैजसो खुलेका जिल्ला सदस्य तथा अगुवा कार्यकर्ता नेपाल– प्रचण्ड खेमामा देखिएका छन् । सुनकोसी, चम्पादेवी र चिशंखुगढी गाउँ कमिटीका सबै पदाधिकारी तथा नेताहरू एकीकृत नेकपाको पक्षमा विज्ञप्ति जारी गरेर संसद विघटनको विरोधमा रहेको नेकपाका जिल्ला इञ्चार्ज रहेका केन्द्रीय सदस्य यज्ञराज सुनुवारले बताए ।