धनुषा– नेपाल कम्युनिस्ट पार्टी (नेकपा) को प्रचण्ड–माधव समूहले धनुषामा आन्दोलन चर्काउन पालिकास्तरीय संघर्ष समिति गठन गरेको छ ।

प्रधानमन्त्री केपी ओलीले हठात् प्रतिनिधिसभा विघटन गरेको भन्दै प्रचण्ड–नेपाल समूहको नेकपाले धनुषाको दर्जनभन्दा बढी स्थानीय तहमा आन्दोलनका लागि संघर्ष समिति गठन गरेको हो ।

धनुषाका १८ स्थानीय तहमध्ये १५ वटा पालिकामा १ सयदेखि ५ सय सदस्यीय रहेको आन्दोलन संघर्ष समिति गठन गरिएको नेकपा धनुषाका सचिव दीपक यादवले जानकारी दिए ।

संघर्ष समिति गठनका लागि नेकपाको प्रचण्ड–नेपाल समूहका केन्द्रीय सदस्य तथा आन्दोलन संघर्ष समिति प्रदेश २ का संयोजक सुधीर साह, केन्द्रीय सदस्य रामचन्द्र झा, धनुषा इन्चार्जसमेत रहेका श्रवण यादव बरबरिया, केन्द्रीय सदस्य श्रीप्रसाद साह, केन्द्रीय सदस्य रत्नेश्वरलाल गोइत, केन्द्रीय सदस्य बोधमाया यादवलगायत नेताहरू सक्रिय भएका छन् ।

केन्द्रीय सदस्य रामचन्द्र झाको अगुवाइमा कमला नगरपालिकामा देवचन्द्र यादवको संयोजकत्व र कपिलदेव मनरैतको सह–संयोजकत्वमा २ सय ५० सदस्यीय, विदेह नगरपालिकामा राजकिशोर यादवको संयोजकत्व तथा महिन्द्र रामको सह– संयोजकत्वमा ३ सय सदस्यीय संघर्ष समिति गठन भएको सचिव दीपक यादवले बताए ।

यस्तै, नेता झल्कु यादवको पहलमा धनुषाधाम नगरपालिकामा भगवानदत साहको संयोजकत्व तथा परीक्षण यादवको सह–संयोजकत्वमा १ सय ५० सदस्यीय, केन्द्रीय सदस्य बोधमाया यादवको पहलमा गणेशमान चारनाथ नगरपालिकामा महेश यादवको संयोजकत्व र पुरश्रीतम लामाको सह–संयोजकत्वमा ३ सय सदस्यीय संघर्ष समिति गठन भएको छ ।

धनुषा सचिव दीपक यादवको पहलमा हंसपुर नगरपालिकामा सुशील साहको संयोजकत्व र सुनील यादवको सह–संयोजकत्वमा २ सय ५० सदस्यीय समिति, मिथिला बिहारी नगरपालिकामा प्रदीप साहको संयोजकत्व एवं सुरेश मण्डल र सञ्जय शर्माको सह–संयोजकत्वमा २ सय ५१ सदस्यीय समिति, बटेश्वर गाउँपालिकामा नेता देवसागर दास र नेतृ तारा महतोको पहलमा रामखेलावन महतोको संयोजकत्व र कुसे महतोको सह–संयोजकत्वमा २ सय ५ सदस्यीय संघर्ष समिति गठन गरिएको छ ।

यसैगरी प्रचण्ड–नेपाल समूहको नेकपाले सहिदनगर नगरपालिकामा केन्द्रीय सदस्य श्रवण यादव बरबरिया तथा नगरप्रमुख उदय बरबरियाको पहलमा तनुलाल यादवको संयोजकत्व र रामदियाल यादवको सह–संयोजकत्वमा ५ सय सदस्यीय समिति, धनौजी गाउँपालिकामा मोमिद राईनको संयोजकत्वमा २ सय सदस्यीय संघर्ष समिति गठन गरिएको छ ।

केन्द्रीय सदस्य श्रीप्रसाद साहको पहलमा मुखियापट्टी गाउँपालिका पनि शिवकुमार झाको संयोजकत्व तथा फकिर साहको सह–संयोजकत्वमा २ सय सदस्यीय समिति र लक्ष्मीनिया गाउँपालिकामा चनरदीप यादवको पहलमा सूर्यदेव यादवको संयोजकत्व तथा सत्यनारायण यादवको सह–संयोजकत्वमा १ सय ५१ सदस्यीय आन्दोलन संघर्ष समिति गठन भएको सचिव यादवले जानकारी दिए ।

त्यसैगरी सबैला नगरपालिकामा केन्द्रीय सदस्य सुधीर साहको पहलमा विष्णुदेव यादवको संयोजकत्व र पर्शुराम साह, विजय साह, सेराग राइनलगायतको सह–संयोजकत्वमा २ सय ५१ सदस्यीय संघर्ष समिति गठन गरिएको छ ।

धनुषा सदरमुकामसमेत रहेका प्रदेश २ को अस्थायी राजधानी जनकपुरधाम उपमहानगरपालिका, जनकनन्दनी गाउँपालिका, नगराईन नगरपालिका, मिथिला नगरपालिकामा आन्दोलनका लागि संघर्ष समिति गठन गर्न बाँकी रहेकाले छिट्टै सबै पालिकामा संघर्ष समिति गठन गरिने सचिव यादवले बताए ।