काठमाडौं– नेकपाको अस्तित्व सकिने सर्वोच्च अदालतको फैसलासँगै नेकपा माओवादी केन्द्रलाई संघीयदेखि प्रदेशसम्मका १६ सांसद घाटा लागेको छ । 

नेकपाभित्रको विवाद चुलिएसँगै प्रधानमन्त्री तथा एमाले अध्यक्ष केपी शर्मा ओली खेमामा लागेका माओवादी केन्द्रका १६ सांसदले सांसद पद माया मारेर एमालेलाई साथ दिएका छन् । 

माओवादीका सांसदले एमालेलाई साथ दिदा सो पार्टीलाई देशभरबाट १६ सांसद घाटा लागेको छ । संघीय सांसदमा ६ पद गुमाएको माओवादीले प्रदेशमा १० जना सांसद गुमाएको छ । 

राष्ट्रिय सभाका सदस्य रामबहादुर थापा (वादल) र अर्का सदस्य चन्द्रबहादुर खड्काले ओलीलाई साथ दिएपछि थापा माओवादीका कारवाहीमा परिसकेका छन् भने खड्कापनि कारवाहीको प्रक्रियामा छन् । 

संघीय प्रतिनिधिसभामा माओवादीका तर्फवाट प्रतिनिधित्व गर्ने  ४ सांसदहरु टोपबहादुर रायमाझी, लेखराज भट्ट, प्रभु साह र गौरीशंकर चौधरीपनि ओलीतर्फ लागेपछि कारवाहीमा परिसकेका छन् । 

माओवादीले प्रदेश २ मा सवैभन्दा धेरे सांसद गुमाएको छ । त्यहा उसले तीन जना प्रत्यक्ष निर्वाचित प्रदेशसभा सदस्य र एकजना समानुपातिक सांसद गुमाएको छ । 

प्रदेश २ बाट निर्वाचित माओवादीका सांसदहरु रामचन्द्र मण्डल धनुषा–१ को ख बाट निर्वाचित प्रदेशसभा सदस्य हुन् । बारा –३ को क बाट निर्वाचित ज्वालाकुमारी साह र रौतहट– ३ को ख बाट निर्वाचित कुन्दनप्रसाद कुशवाह पनि एमाले भएका छन् । बाराबाट समानुपातिकतर्फ निर्वाचित मोहम्मद समिर पनि एमाले प्रवेश गरे ।

लुम्बिनीका दुई सांसद गुमाएको माओवादीले कर्णलीबाट दुई र प्रदेश १ वाट एक सांसद पद गुमाएको छ । एमाले प्रवेश गरेसँगै उनीहरु सवैलाई माओवादीले कारवाही गरिसकेको छ । 

लुम्बिनीका प्रदेशसभा सदस्यमध्ये रूपन्देहीबाट निर्वाचित प्रदेश सभाको अर्थ, उद्योग, पर्यटन समितिका सभापति दधिराम न्यौपाने र गुल्मीबाट निर्वाचित दिनेश पन्थी एमाले प्रवेश गरेका कारण कारवाहीमा परेका छन् । गण्डकी र वागमती प्रदेशबाट मात्र माओवादीले आफ्ना सांसद जोगाएको छ । 

हेर्नुहोस कहाँका सांसदले छाडे माआवादी 

प्रतिनिधि सभाका ४ सांसदहरु 

टोपबहादुर रायमाझी
लेखराज भट्ट
प्रभु साह
गौरीशंकर चौधरी

राष्ट्रिय सभाका २ जना सांसदहरु

राम बहादुर थापा बादल
चन्द्रबहादुर खड्का

प्रदेश १ बाट 

टंक आङवोहाङ 

प्रदेश २ बाट 

रामचन्द्र मण्डल 
ज्वालाकुमारी साह 
कुन्दनप्रसाद कुशवाह 
मोहम्मद समिर 

लुम्बिनी प्रदेशबाट

दधिराम न्यौपाने 
दिनेश पन्थी 

कर्णाली प्रदेशबाट

ठम्मर विष्ट
धर्मराज रेग्मी

सुदुरपश्चिम प्रदेशबाट

झपट बोहरा