काठमाडौं– कुनै बेला प्रधानमन्त्री शेरबहादुर देउवा निकट रहेका नेपाली कांग्रेसका उपसभापति विमलेन्द्र निधिले पार्टीको आउँदो १४औँ महाधिवेशनमा सभापतिमा उम्मेदवारी घोषणा गरेका छन् । काठमाडौंको नयाँ बानेश्वरस्थित आफ्नो सम्पर्क कार्यालयबाट निधिले औपचारिक रूपमा सभापतिमा उम्मेदवारी दिने घोषणा गरेका हुन् ।

हालका पार्टी सभापति तथा प्रधानमन्त्री देउवाले पनि सभापतिमा उठ्न घोषणा गरिसकेका छन् । निधिको पार्टी सभापतिमा उम्मेदवारी घोषणासँगै देउवातिर जाने मत केही घट्नेछ । ‘लोकतन्त्र प्राप्तिका लागि विगतका संघर्षपूर्ण कठिन दिनमा अनेक सहकर्मीसँगै मैले जेलनेलको लामो शृंखला अनुभव गरेको छु । विगतको पृष्ठभूमि र नेतृत्वदायी अनुभवको यस चरणमा मैले कांग्रेसको केन्द्रीय सभापति पदमा आफूलाई प्रस्तुत गरेको छु,’ निधिले भने ।

कांग्रेसमा वर्तमान सभापति देउवा, वरिष्ठ नेता रामचन्द्र पौडेल, पूर्वउपसभापति गोपालमान श्रेष्ठ, महामन्त्री शशांक कोइराला, पूर्वमहामन्त्रीद्वय प्रकाशमान सिंह, कृष्णप्रसाद सिटौला, केन्द्रीय सदस्य शेखर कोइराला, कल्याण गुरुङले सभापतिमा दाबी गरेका छन् । तर, अहिलेसम्म औपचारिक रूपमा सभापतिको उम्मेदवारी घोषणा गुरुङले मात्र गरेका थिए । बिहीबार निधिले घोषणापत्रसहित उम्मेदवारी घोषणा गरेका छन् । 

सभापतिमा उम्मेदवारी प्रस्तुत गर्दै उनले आफ्ना परिकल्पना, ध्येय र उद्देश्यसहित कार्ययोजना र पार्टीभित्रको आवश्यक सुधारलाई केन्द्रबिन्दुमा राखेको घोषणापत्र बनाएका छन् । सभापतिको उम्मेदवारका लागि तयार पारेको घोषणापत्रमा परिकल्पना, उद्देश्य, ध्येय, र अन्य सुधार शीर्ष राखिएको छ । 

आफू सभापति भए वैचारिक रूपमा स्पष्ट, गतिशील र जनतासँग जोडिने कांग्रेस बनाउने निधिको मुख्य नारा छ । संघीय लोकतान्त्रिक गणतन्त्रलाई सुदृढ र सार्थक पार्ने कांग्रेस बनाउने उनको संकल्प रहेको छ । 

कांग्रेसलाई देशको एकमात्र सुसंगठित, सुव्यवस्थित र सक्षम लोकतान्त्रिक पार्टीको रुपमा देशभित्र र अन्तर्राष्ट्रिय स्तरमा पुनस्र्थापित गराउने, भ्रातृ तथा शुभेच्छुक संस्थाहरू र जनसम्पर्क समितिलाई व्यवस्थित, मर्यादित, समयानुकूल, विधिसम्मत, संगठित र सशक्त बनाउँदै देश र जनताको सेवामा सक्रिय बनाउने र तीन वटै तहको आगामी निर्वाचनमा  बहुमतका साथ विजयी गराउने उने संकल्प लिएका छन् । कांग्रेसमा रुपान्तरण, पुस्तान्तरण र पुस्ता हस्तान्तरण प्रक्रियालाई सहजीकरण गर्ने उद्घोष उनको छ ।