चितवन–युवा नेता योगेन्द्र शाहीले कर्णाली भूगोल खुलाबाट नेकपा एमालेको १०औँ महाधिवेशनमा केन्द्रीय सदस्यमा उम्मेदवारी दिएका छन् । पार्टी विभाजन भएसँगै एकताको पक्षमा उभिएर कर्णाली प्रदेश योजना आयोगको सदस्यबाट राजीनामा दिएका शाहीले केन्द्रीय सदस्यमा उम्मेदवारी दर्ता गराएका हुन् ।

पार्टी एकतालाई थप सुदृढ गर्न र आदर्श राजनीतिका लागि युवा नेतृत्वलाई राजनीतिमा लाग्न प्रेरित गर्ने उद्देश्यले उम्मेदवारी दिएको उनले बताए । युवा नेता शाही ०५१ मा १८ वर्षको उमेरमै सुर्खेत शिक्षा क्याम्पसको स्ववियु सभापति भई पूर्णकालीन राजनीतिमा प्रवेश गरेका हुन् ।

विश्व प्रजातान्त्रिक युवा संघको उपाध्यक्ष र एसियाली राजनीतिक पार्टीहरूको संगठन (आइक्याप) मा संलग्न भई विश्वका ६० भन्दा बढि देशमा प्रतिनिधि तथा वक्ताका रूपमा शाहीले सहभागिता जनाएका छन् । ‘युथ भिजन २०२५’ निर्माण कार्यदलको संयोजक भएर आफ्नो जिम्मेवारी पूरा गरेका शाही एमालेभित्र बौद्धिक नेताका रूपमा चिनिन्छन् ।