बाजुरा– बाजुराको त्रिवेणी नगरपालिकाका नगरप्रमुख रामसिंह रावलले छापामार शैलीमा नगर अधिवेशन सम्पन्न गरेको नगरसभा सदस्यहरूले आरोप लगाएका छन । नगरपालिकाका ६ जना वडाध्यक्ष र कार्यपालिकाका सदस्यबिनै नगरप्रमुख रावलले नगरसभामा एकलौटी गरेको वडा वडा नम्बर ७ का वडाध्यक्ष प्रेमबहादुर थापाले बताए । १० असारभित्रै नगरसभा सम्पन्न गर्नुपर्नेमा नगरप्रमुख रावलले छापामार शैलीमा सभा सम्पन्न गर्नुमा भ्रष्टाचारको कारण भएको उनीहरूको आरोप छ ।

नगरसभाका सदस्यहरूलाई जानकारी नदिई रातारात नगर अधिवेशन सम्पन्न गरिएको वडाध्यक्ष प्रेम थापाले बताए । ‘नगरप्रमुख रावल पनि कांग्रेसकै हुन् । हामी पनि कांग्रेसकै हौँ । नगरप्रमुखले हिटलर शैली देखाए’, एक वडाध्यक्षले भने । हालै सम्पन्न कांग्रेस अधिवेशनमा नगरप्रमुख रावलले जिल्ला सभापतिमा जितेका छन् ।

नगरपालिकामा भ्रष्टाचार गरेको आरोपमा नगरप्रमुखलाई नै ज्ञापनपत्र बुझाउँदासमेत सुनुवाइ नहुँदै एकाएक नगर अधिवेशन सम्पन्न गर्नु गलत भएको वडा नम्बर २ का वडाध्यक्ष प्रभुराजराज जोशीले बताए ।

७ असारदेखि स्थगित नगरसभा सञ्चालन गर्न पटक–पटक माग गर्दा पनि अस्वीकार गरेकामा शनिबार एकाएक नगरसभा सदस्य तथा वडा नम्बर १ का वडाध्यक्ष मनराज बुढाको दाबी छ ।

६ वटा वडाका वडाध्यक्ष र नगरसभाका सदस्यलगायत २७ जनाको हस्ताक्षरसहित केही दिनअघि ध्यानाकर्षणसहितको ज्ञापनपत्र बुझाए पनि बेवास्ता गरी नगरसभा सम्पन्न गरेको वडाध्यक्षहरूले बताए ।

‘६ वटा वडाका वडाध्यक्षलाई सहभागी नगराएरै नगरसभा सम्पन्न गरेकामा जिल्ला प्रशासनलगायतमा पनि जानकारी गराएका छौँ’, वडाध्यक्ष थापाले भने ।नगरपालिकामा कांग्रेस अधिवेशन गरिएको र पछि नगरसभा गरौँला भन्दै आलटाल गरिरहेका नगरप्रमुख रावलले नगरको सबै पैसा अधिवेशनमा खर्च गरेको वडाध्यक्ष थापाको दाबी छ ।

नगरसभामा त्रिवेणी नगरपालिका वडा नम्बर १ का वडाध्यक्ष मनराज बुढा, वडा नम्बर २ का वडाध्यक्ष प्रभुराज जोशी, वडा नम्बर ५ का वडाध्यक्ष गम्भीर बुढा, वडा नम्बर ६ का वडाध्यक्ष खड्कबहादुर बुढा, वडा नम्बर ७ का वडाध्यक्ष तथा नगरपालिका प्रवक्ता प्रेमबहादुर थापा र वडा नम्बर ९ का वडाध्यक्ष वीरबहादुर विष्टलगायत नगरसभाका २७ जना सदस्यलाई जानकारी नदिइएको वडाध्यक्षको भनाइ छ ।

नगरपालिकाले यो आर्थिक वर्षमा १४ करोड विनियोजन गर्नुपर्नेमा १३ करोड रुपैयाँ अघिल्लो वर्षको दायित्व बुझाउनुपर्ने भन्दै आलटाल गरेको जनप्रतिनिधिको दाबी छ ।