यही वैशाख ३० गते हुने स्थानीय तह निर्वाचनमा सबै दल तथा स्वतन्त्र गरि १ लाख ५१ हजार ७ सय ५६ जनाले उम्मेद्वारी दर्ता गराएका छन् । देशैभरका ७ सय ५३ स्थानीय तहका लागि यति संख्यामा उम्मेद्वारी परेको हो । आसन्न स्थानीय तहको निर्वाचनका लागि सबैभन्दा बढी नेकपा एमालेले उम्मेद्वारी दिएको छ ।

निर्वाचन आयोगका अनुसार नगरपालिकाका प्रमुख-उपप्रमुख तथा गाउँपालिकाका अध्यक्ष-उपाध्यक्ष गरी सबै पदमा अहिलेसम्म नेकपा एमालेबाट ३३ हजार २ सय ५७ जनाको उम्मेद्वारी परेको छ । एमालेबाट प्रमुख पदमा २ सय ६३ पुरुष र २७ महिलाको उम्मेद्वारी परेको छ । त्यस्तै अध्यक्षमा ४ सय १८ पुरुष र २८ महिलाको उम्मेद्वारी परेको छ । त्यस्तै उप्रमुखका २६ पुरुष र २ सय ५९ महिलाको उम्मेद्वारी परेको छ भने उपाध्यक्षमा ३५ पुरुष र ४ सय १० जना महिलाको उम्मेद्वारी परेको छ । त्यस्तै वडाध्यक्षमा एमालेबाट ६ हजार ३ सय ७६ जना पुरुष र १ सय १९ महिलाले उम्मेद्वारी दिएका छन् ।

स्थानीय तहको निर्वाचनमा दोस्रो स्थानमा रहेको नेपाली कांग्रेसबाट २ सय ५३ जना पुरुष र ११ जना महिलाले प्रमुख पदमा उम्मेद्वारी दिएका छन् । त्यस्तै ३ सय ६३ जना पुरुष र १९ जना महिलाले अध्यक्ष पदमा उम्मेद्वारी दिएका छन् । त्यस्तै कांग्रेसबाट उपप्रमुख पदमा ३१ जना पुरुष र १ सय ८० महिलाले उम्मेद्वारी दिँदा उपाध्यक्षमा ६७ पुरुष र २ सय ९२ महिलाको उम्मेद्वारी परेको छ । त्यस्तै वडाध्यक्षमा कांग्रेसबाट ६ हजार ३६ जना पुरुष र ८० जना महिलाको उम्मेद्वारी दिएका छन् । कांग्रेसबाट सबै पदमा गरी ३१ हजार २ सय २० जनाको उम्मेद्वारी परेको छ ।

नेकपा माओवादी केन्द्रबाट १ सय ५६ जना पुरुष र १८ जना महिलाले प्रमुख पदमा उमेदवारी दिएका छन् । त्यस्तै अध्यक्ष पदमा माओवादीबाट २ सय ६१ पुरुष र २९ महिलाले उम्मेद्वारी दिएका छन् । त्यसैगरी उपप्रमुख पदमा ८४ पुरुष र १ सय २८ जना महिलाको उम्मेद्वारी पर्दा उपाध्यक्षमा १ सय १२ पुरुष र २ सय ३ महिलाको उम्मेद्वारी परेको छ । त्यसैगरी वडाध्यक्षमा माओवादीबाट ४ हजार ३ सय २१ पुरुष र ९१ महिलाले उम्मेद्वारी दिएका छन् । माओवादीबाट सबै पदमा २२ हजार ६८ जनाको उम्मेद्वारी परेको छ ।