बैशाख २४, २०८१
बैशाख २०, २०७९
काठमाडौँ । निर्वाचन आयोगले आसन्न स्थानीय तह निर्वाचनका लागि विभिन्न पदमा उम्मेदवारी दिएका मध्ये अहिलेसम्म ३ सय ५३ जना निर्विरोध निर्वाचित भएको जानकारी दिएको छ ।
२०७४ सालको स्थानीय तहको निर्वाचनमा ४ सय १२ जना निर्विरोध भएका थिए । यस पटक पनि यो संख्या केही बढ्न सक्ने आयोगको अनुमान छ ।
यही वैशाख ३० गते हुने निर्वाचनमा पाँच दलीय सत्ता गठबन्धन र प्रमुख प्रतिपक्षी नेकपा एमालेसहित गठबन्धन दलहरू चुनावी मैदानमा होमिएका छन् । गठबन्धन बाहिर रहेका केही दल र स्वतन्त्र रूपमा समेत उम्मेदवारी परेका छन् ।
आयोगका अनुसार अहिलेसम्म निर्विरोध हुनेमा सत्ता गठबन्धनबाट नै धेरै छन् । गठबन्धनबाट अहिलेसम्म १ सय ९० जना निर्विरोध निर्वाचित भइसकेका छन् । जसमा विभिन्न ९ दलसहित स्वतन्त्र उम्मेदवार समेत छन् ।
गठबन्धनमा रहेको सबैभन्दा ठुलो दल नेपाली काँग्रेसले १ सय १ पदमा जितिसकेको छ भने नेकपा माओवादी केन्द्रले ५४, नेकपा एकीकृत समाजवादीले ३४ र जसपाले १ पदमा निर्विरोध जित हात पारेको छ ।
यस्तै नेकपा एमाले १ सय २३ पदमा निर्विरोध भएको छ । आसन्न स्थानीय निर्वाचनका लागि गत वैशाख ११ र १२ मा उम्मेदवारी दर्ता भएको थियो भने वैशाख १६ गते उम्मेदवारी फिर्ता लिने समय दिइएको थियो ।
स्थानीय तह निर्वाचनमा यस पटक ३५ हजार २ सय २१ पदमा चुनाव हुँदै छ । जसमध्ये १ सय ७० दलित सदस्य पदमा उम्मेदवारी नै नपरेको आयोगले जनाएको छ । गत स्थानीय निर्वाचनमा १ सय ७६ दलित सदस्य पदमा उम्मेदवारी परेको थिएन ।
कुन कुन पदमा निर्विरोध ?
नेकपा एमाले
अध्यक्ष–१, उपाध्यक्ष–२, वडाध्यक्ष–१४, वडा सदस्य–२६, महिला सदस्य–२३ र दलित महिला सदस्य–५७ ।
नेपाली काँग्रेस
उपाध्यक्ष–१, वडाध्यक्ष–१४, वडा सदस्य–३१, महिला सदस्य–१५ र दलित महिला सदस्य–४० ।
नेकपा माओवादी केन्द्र
वडाध्यक्ष–३, वडा सदस्य–५, महिला सदस्य–७ र दलित महिला सदस्य–३९ ।
नेकपा एकीकृत समाजवादी
अध्यक्ष–२, उपाध्यक्ष–१, वडाध्यक्ष–५, वडा सदस्य–१२, महिला सदस्य–७ र दलित महिला सदस्य–६ ।
राप्रपा
वडा सदस्य–२ ।
स्वतन्त्र
वडाध्यक्ष–६, वडा सदस्य–१६, महिला सदस्य–८ र दलित महिला सदस्य–४ ।
राष्ट्रिय जनमुक्ति पार्टी
महिला सदस्य–१ ।
लोसपा
दलित महिला सदस्य–१ ।
जसपा
दलित महिला सदस्य–१ ।
नेपाल मजदुर किसान पार्टी
दलित महिला सदस्य–२ ।
बैशाख ०७, २०८१
बैशाख ०७, २०८१
बैशाख ०७, २०८१
बैशाख १९, २०८१
बैशाख २४, २०८१
