काठमाडौँ । नेपालका कम्युनिस्ट शक्तिहरूबिच फेरि एकता गराउन उत्तरी छिमेकीको सक्रियता बढेको छ ।

चिनियाँ कम्युनिस्ट पार्टी (सिपिसी) का विदेश विभाग प्रमुख लिउ जियानचाओले सत्तारुढ नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीसँग भिडिओ कल गरेको सो पार्टीले आफ्नो वेबसाइटमार्फत जनाएको छ ।

प्रचण्डसँग बिहीबार र नेकपा एमालेका अध्यक्ष केपी शर्मा ओलीसँग शुक्रबार भिडिओ कुराकानी भएको विभागले सार्वजनिक गरेको हो ।

भिडिओ वार्तापछि दुई पार्टीबिच आदानप्रदान र सहयोगसम्बन्धी समझदारी पत्र (एमओयु) मा समेत हस्ताक्षर भएको सिपिसीले जनाएको छ । भिडिओ वार्तामा सिपिसी केन्द्रीय समितिको अन्तर्राष्ट्रिय विभागका उपमन्त्री चेन झोउको समेत सहभागिता रहेको थियो ।

दाहालसँग बिहीबार भएको कुराकानीमा चिनियाँ नेता लिउले चीन र नेपाल हिमाल र नदीले जोडिएका मित्रवत् छिमेकी रहेको उल्लेख गरेका छन् । उनले दुई मुलुकका भविष्य साझा रहेको समेत बताएको सिपिसीले उल्लेख गरेको छ।

सिपिसीका महासचिव समेत रहेका चिनियाँ राष्ट्रपति सी चिनफिङको सन् २०१९ मा सम्पन्न नेपाल भ्रमणको प्रसङ्ग निकाल्दै नेता लिउले उक्त ऐतिहासिक यात्रापछि दुई देशबिचको सम्बन्ध विकास र समृद्धिको लागि रणनीतिक साझेदारीमा स्तरोन्नति भएको बताएका थिए । उनले सीको भ्रमणपछि दुई पक्षीय सम्बन्ध नयाँ युगमा प्रवेश गरेको समेत बताएका छन् ।

चीन र नेपालका शीर्ष तहमा भएका महत्त्वपूर्ण सहमति कार्यान्वयन गर्न, राजनीतिक आपसी विश्वासलाई गहिरो बनाउन, ठुला परियोजना सक्रिय रूपमा अघि बढाउन र ‘बेल्ट एन्ड रोड’ अवधारणाअन्तर्गत विभिन्न क्षेत्रमा व्यावहारिक सहकार्य अघि बढाउन चीन नेपालसँग काम गर्न इच्छुक रहेको भिडिओ कुराकानीमा लिउले बताएका थिए ।

चिनियाँ नेता लिउले चिनियाँ कम्युनिस्ट पार्टी, माओवादी केन्द्र र एमालेका विचार र भावना समान रहेको बताएका बताउँदै दुवै पार्टीसँगको आदानप्रदानलाई थप सुदृढ गर्न तथा जनस्तरको सम्पर्क बढाउन चाहेको बताएको सिपिसीले उल्लेख गरेको छ।

निकट भविष्यमा हुन लागेको चिनियाँ कम्युनिस्ट पार्टीको २० औँ राष्ट्रिय महाधिवेशनले चीनको विकासको खाका तयार गर्नुका साथै नेपाल–चीन सम्बन्धको विकासमा नयाँ गति दिने लिउले बताएका थिए।

भिडिओ वार्तामा दाहाल र ओलीले नेपाल र चीनबिचको मित्रता चिरस्थायी रहेको बताएको सिपिसीले जनाएको छ । त्यस क्रममा दुवै नेताले चिनियाँ कम्युनिस्ट पार्टीसँगको सम्बन्धलाई उच्च प्राथमिकता दिने बताउँदै कुनै पनि शक्तिलाई चीन विरोधी गतिविधिमा संलग्न हुन नेपाली भूमि प्रयोग गर्न कहिल्यै अनुमति नदिने प्रतिबद्धता जनाएका थिए।

यसअघि चीनले नेपालले अमेरिकी सेनाको स्टेट पार्टनरसिप प्रोग्राम (एसपीपी) अघि नबढाउने निर्णय गरेकोमा प्रशंसा गरेको थियो । बिहीबार चिनियाँ विदेश मन्त्रालयका प्रवक्ता वाङ् वेनबिनले एसपीपी अस्वीकार गर्ने नेपालको निर्णयको स्वागत गरेका थिए ।