भदौ २४, २०८१
पुस ११, २०७७
काठमाडौैँ- देश संघीयतामा गएको चार वर्ष भयो । जनतालाई गाउँगाउँमा सिंहदरबार पुर्याउने सपना देखाइयो । जनप्रतिनिधि आएपछि आमूल परिर्वतन हुने अपेक्षा गरेका जनतामा निराशा छाउन थालेको छ ।
देशमा कायापलटै गर्छु भन्दै घोषणापत्र सार्वजनिक गरेका काठमाडौँका जनप्रतिनिधिहरूले चार वर्षसम्म आफ्नै कार्यालयसमेत बनाउन सकेका छैनन् ।
आफ्नै कार्यालय बनाउन नसक्ने जनप्रतिनिधिसँग विकासको के आश गर्ने ? एक सय दिनमा एक सय एक काम गर्ने घोषणा गरेका काठमाडौँ महानगरप्रमुख विद्याशुन्दर शाक्य हालसम्म पनि आफ्नो भवन बनाउने तयारीमा जुटेका छैनन् । त्यसो त, काठमाडौँका अधिकांश स्थानीय तहले आफ्नो भवन बनाउन सकेका छैनन् ।
एकातिर उल्टै मासिक लाखौँ घरभाडा तिरेर बसेका छन् भने अर्कातिर एकै ठाउँबाट सुविधा दिन सकेका छैनन् । कतिपय स्थानीय सरकारले आफ्नै भवन बनाएका छन् । कति तयारीमा लागेको बताउँछन् । काठमाडाैँ महनगर, कागेश्वरी मनोहरा, शंखरापुर, चन्द्रागिरि, टोखा नगरपालिका हालसम्म भाडाको घरमा रहेका छन् ।
कुन नगरपालिकाले कति तिर्छन् घरभाडा
काठमाडौँ महानगर
काठमाडौँ महानगरपालिकाले नगरप्रमुख विद्याशुन्दर शाक्य आएदेखि हालसम्म घर भाडामै ७ करोड ६५ लाख १ हजार ७ सय ५१ रुपैयाँ सकाएको छ । महानगरले मासिक करिब ३० लाख घरभाडामै सकाउने गरेको छ ।
एक सय दिनमा एक सय एक काम गर्ने घोषणा गरेका नगरप्रमुखले तीन वर्षे कार्यकाल बितिसक्दासमेत आफ्नै भवन बनाउन सकेका छैनन् ।
महानगरले २०७४/७५ मा एक करोड ७४ लाख १३ हजार तीन सय ४४ रुपैयाँ घर भाडा तिरेको थियो । २०७५/७६ मा दुई करोड १२ लाख ३६ हजार ६ सय ३० रुपैयाँ तिरेको थियो ।
त्यसैगरी २०७६/७७ मा दुई करोड ३९ लाख ८२ हजार चार सय २० रुपैयाँ तिरेको थियो । २०७७/७८ कात्तिकसम्म ८० लाख १९ हजार चार सय रुपैयाँ घर भाडा तिरेको महानगरले जनाएको छ ।
कागेश्वरी मनोहरा नगरपालिका
कागेश्वरी मनोहराले पनि हालसम्म आफ्नै भवन बनाउन सकेको छैन । गत वर्ष नै निर्माण गर्ने भनिएको भवन विवादका कारण बनाउन नसकेको नगरपालिकाले जनाएको छ ।
मनोहराले वडा कार्यालयसमेतको गरी मासिक ४५ लाख रुपैयाँ घर भाडा तिर्दै आएको छ । आफ्नै भवन बनाउने तयारीमा छ ।
शंखरापुर नगरपालिका
शंखरापुरको आफ्नो भवन बनाउने तयारी छैन । घर भाडाबापत मात्र यो नगरपालिकाले मासिक ६० लाख रुपैयाँ खर्चेको नगरप्रमुख सुवर्ण श्रेष्ठले बताए ।
चन्द्रागिरि नगरपालिका
चन्द्रागिरिले घर भाडाबापत मासिक तीन लाख रुपैयाँ तिर्दै आएको छ ।
टोखा नगरपालिका
टोखाले आफ्नो भवन बनाउन सकेको छैन । जग्गा भाडामा लिएर टहरा बनाएर बसेको छ । १८ करोड रुपैयाँमा आफ्नै भवन बन्दै छ ।
दक्षिणकाली नगरपालिका
दक्षिणकाली हाल सामुदायिक भवनमा रहेको छ । घर भाडा तिरेको छैन । आफ्नै भवन बनाउने तयारीमा छ ।
बूढानीलकण्ठको आफ्नै भवनबाट सेवा
बूढानीलकण्ठको आफ्नै भवन छ । सोही भवनबाट सेवा दिइरहेको छ । १० करोड रुपैयाँको भवन गत मंसिरमै तयार पारेको थियो । हाल पाँच करोड रुपैयाँको अर्काे भवन थप्ने तयारी गरेको छ ।
नार्गाजुन र तारकेश्वर नगरपालिकाले आफ्नै भवन बनाउने तयारी भइरहेको बताएका छन् ।
आफ्नै भवनमा कीर्तिपुर
केही समय अघिसम्म सामुदायिक भवनमा रहेको कीर्तिपुर नगरपालिकाले हाल २० करोड रुपैयाँमा आफ्नै भवन निर्माण गसिकेको छ ।
कात्तिक १४, २०८१
