काठमाडौं– सरकारले अध्यादेश मार्फत संघीय निजामती सेवा ऐन ल्याउने तयारी गरेको छ । ऐनमा कर्मचारीको उमेर हद ६० वर्ष कायम गर्ने गरी छलफल भइरहेको बताइएको छ । अहिले निजामती कर्मचारीको अवकाश उमेर हद ५८ वर्ष कायम छ । लामो समयदेखि संसद्को राज्य व्यवस्था तथा सुशासन समितिमा पनि कर्मचारीको अवकाश उमेर हद ६० वर्ष हुनुपर्नेमा बहस भएको थियो ।

संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठले ऐन जारी भई प्रदेश लोकसेवा आयोग पूर्णरूपमा कार्यान्वयनमा आएपछि स्थानीय तहका प्रमुख प्रशासकीय अधिकृत प्रदेशअन्तर्गत रहने बताए ।  संसद्को राज्य व्यवस्था समितिले छलफलको माध्यमबाट अगाडि बढाएको विषयहरूलाई नै अध्यादेशमार्फत ल्याउन लागिएको बताइएको छ ।