बैतडी– बैतडीको दोगडाकेदार गाउँपालिकाका एकैपटक ११ कर्मचारीको सरुवा गरिएपछि पालिकालाई प्रशासनिक काममा अवरोध भएको छ । संघीय सरकारले हालै ल्याएको नयाँ नीतिमा स्थानीय तहका कर्मचारी सरुवा खुला गरेपछि दोगडाकेदारका ११ कर्मचारीको एकैपटक सरुवा भएको हो ।

पालिकामा कार्यरत १ इन्जिनियर, २ ओभरसियर तथा १ सब–ओभरसियर, ५ जना वडा सचिव, १ आइटी अफिसर र १ आन्तरिक लेखा परीक्षकको एकैपटक सरुवा भएको गाउँपालिकाले जनाएको छ ।

कर्मचारीको अन्यत्रै सरुवा भएपछि नियमित काम चलाउन मुस्किल भएको गाउँपालिका अध्यक्ष चक्र कार्कीले बताए । उनले भने, ‘बैतडीका पालिकामध्ये पहिलो पटक कर्मचारी भर्ना गर्ने हामी नै हौँ । हालसम्म सरुवा रोकेको हुँदा कर्मचारी अभाव थिएन । तर, अहिले संघीय सरकारले नबुझेरै ल्याएको नीतिका कारण कर्मचारीको सरुवा भयो । अहिले हामीलाई काम गर्न असहज भएको छ ।’ 

केही पदमा करारका कर्मचारी भर्ना गर्न सकिने भए पनि इन्जिनियर र वडा सचिव पदपूर्तिमा समस्या हुने अध्यक्ष कार्कीले बताए । नयाँ भर्ना गरेकामध्ये ३ जनाबाहेक सबै कर्मचारी सरुवा भएको उनले जानकारी दिए ।

दोगडाकेदारका ८ मध्ये वडा नम्बर १ बाहेकका सबै वडा सचिवविहीन भएको गाउँपालिकाका प्रमुख प्रशासकिय अधिकृत रवीन्द्रबहादुर धामीले बताए । कामको चाप बढेका बेला कर्मचारी सरुवा हँुदा सेवा प्रवाहमा समस्या भएको उनको भनाइ छ ।