भदौ २४, २०८१
माघ ०८, २०७८
पर्सा– कोभिडको ओमिक्रोन भेरियन्टको संक्रमण फैलिँदै गएपछि सम्भावित जोखिम न्यूनीकरण गर्ने उद्देश्यले पर्सा जिल्ला प्रशासन कार्यालयले सेवाग्राहीलाई आलोपालो सेवा सुरु गरेको छ ।
आइतबारदेखि लागू हुने गरी जिल्लाभरिका सबै पालिकालाई सातामा २ दिन तोकिएको समय पर्ने गरी सेवा दिइने प्रमुख जिल्ला अधिकारी उमेशकुमार ढकालले जानकारी दिए ।
सोहीबमोजिम आइतबार र सोमवार कालिकामाई, ठोरी, पकाहा मैनपुरगाउँ, धोबिनी, छिपहरमाई र पटेर्वा सुगौली गाउँपालिकाका सेवाग्राहीको कार्य हुनेछ । मंगलबार र बुधबार जगरनाथपुर, बिन्ध्यवासिनी, पोखरिया, पर्सागढी र बहुदरामाई नगरपालिका क्षेत्रको पालो राखिएको छ ।
बिहीबार र शुक्रबार जिराभवानी तथा सखुवा प्रसौनी गाउँपालिका र वीरगञ्ज महानगरका सेवाग्राहीको काम हुने बताइएको छ । जिल्लामा पछिल्लो समय कोभिड संक्रमण बढ्दै गएपछि भीडभाड कम गरी स्वास्थ्य मापदण्ड अपनाएर आलोपाले सेवा दिन जिप्रकाले जिल्लास्थित सबै कार्यालयलाई निर्देशन दिएको छ ।
यसैबीच कोभिडको पछिल्लो नयाँ रूप ओमिक्रोन भेरियन्टको संक्रमण फैलिँदै गएपछि सम्भावित जोखिम न्यूनीकरण गर्ने उद्देश्यले प्रजिअ उमेशकुमार ढकाल आआफैँ जनचेतनामूलक अभियानमा जुटेका छन् ।
सर्वसाधारणलाई वर्तमान अवस्थामा स्वास्थ्य मापदण्डमूलक सन्देश प्रवाह आवश्यक रहेकाले आफंै मास्क वितरणसहित अन्य जनचेतनामूलक अभियानमा जुटेको उनले बताए ।
नागरिकमा लापरबाही गर्ने परिपाटीले जोखिम बढ्न सक्ने भएकाले मास्क वितरणसहित अन्य जनचेतना जगाउन प्रजिअ ढकालसहित जिल्लास्थित सुरक्षा निकायका प्रमुख अभियानमा लागेका हुन् ।
जिप्रकाले सामुदायिक प्रहरी सेवा केन्द्रसँगको सहकार्यमा आयोजना गरेको सचेतनामूलक कार्यक्रमअन्तर्गत एकै दिन करिब ५ हजारलाई निःशुल्क मास्क वितरण गरिएको थियो । यसैबीच जिप्रकाले सार्वजनिक स्थलमा मास्क नलगाउनेलाई १०० रुपैयाँ जरिमाना गर्ने भएको छ ।
कात्तिक १४, २०८१
