मुगु- मुगुको मुगुमकामारोङ गाउँपालिकामा सोनाम ल्होसारको चहलपहल सुरु भएको छ । मुगुमकामारोङमा अधिकांश भोटे/लामा समुदायको बाहुल्य छ । मुगुमकामरोङका ९ वटा वडामध्ये ८ वडा वडामा अधिकांश भोटे जनजाति समुदायअन्तर्गतका लामा, तामाङ, गाहालगायत समुदाय बसोबास गर्छन् । 

गाउँपालिकाका भोटे बस्तीमा सोनाम ल्होसार मनाउने क्रम बिहीबारदेखि सुरु भएको हो । बालबालिकादेखि वृद्धवृद्धासम्म सोनाम ल्होसारको रमाइलोमा झुमेका भेटिन्छन् । सोनाम ल्होसारको अवसरमा सबैले नाचगान गर्ने, मीठामीठा परिकार बनाई खाने चलन छ ।

१५ दिनसम्म चल्ने सोनामा ल्होसारमा लामा समुदायले एकआपसका सद्भाव साटासाटा गर्ने, आफन्त छोरीज्वाइँ, भान्जाभान्जी, फुपूफुपाजूलाई घरमा बोलाई मीठा परिकार खुवाउने र आफू पनि आफन्तका घरमा पाहुना जाने चलन रहेको स्थानीय छिरिङ लामाले बताए । उनका अनुसार बिहीबारबाट सुँगुर वर्षको समापन भई मुसा वर्षको शुभारम्भ भएको छ ।

हिमाली भेगमा पर्ने साविक कर्णालीका ५ जिल्ला जुम्ला डोल्पा, हुम्ला, कालीकोट र मुगुमा बसोबास गर्ने लामा समुदायमा सोनाम ल्होसार दसैँ पर्वझैँ धुमधामसाथ मनाउने गर्छन् ।

औंशीबाट सुरु भएको सोनाम ल्होसारमा विशेषगरी बौद्ध धर्मावलम्बीले प्रमुख चाडका रूपमा मनाउने गर्छन् । ल्होसारलाई नयाँ वर्षका रूपमा मनाइने स्थानीय जिग्मेत तामाङले जानकारी दिए । तामाङले भने, ‘सोनाम ल्होसारका बेला युवा-युवतीहरू धनुष वाँण हान्ने, नाचगान गर्ने र मायाप्रेम साटासाट गने गर्छन् ।’