हुम्ला- हुम्लाको सर्केगाड गाउँपालिका वडा नम्बर १ जैरमा कर्णाली प्रदेश सरकार मातहतको सामुदायिक स्वास्थ्य इकाइ १ महिनादेखि बन्द छ । वडा नम्बर १ को छिडी नात्तामा रहेको उक्त सामुदायिक स्वास्थ्य इकाइ बन्द हुँदा नागरिक स्वास्थ्य सेवा पाउनबाट वञ्चित छन् । 

स्वास्थ्यकर्मी नहुँदा उक्त स्वास्थ्य संस्था बन्द भएपछि सेवाग्राहीले घन्टाैंको पैदल हिँडेर स्वास्थ्योपचारका लागि अन्यत्र उपचार गर्न जानुपरेको गुनासो गरेका छन् । २०७६ देखि छिडी नात्ता गाउँमा सामुदायिक स्वास्थ्य इकाइ सञ्चालन आएको थियो । इकाइमा एक–एक जना अहेब, अनमी र कार्यालय सहयोगी गरी ३ जनाको दरबन्दी छ । 

गाउँमा रुघाखोकीका बिरामीको संख्या बढिरहेको छ । स्वास्थ्यकर्मी नहुँदा थप समस्या भएको उनीहरू सुनाउँछन् । इकाइमा दैनिक १०–१२ सम्म बिरामी उपचारका लागि जाने गर्थे । स्वास्थ्यकर्मी नहुँदा सेवाग्राही निराश भएर घर फर्कनुपरेको गुनासो आउन थालेको छ ।

गाउँमा घाँटी, टाउको दुख्ने र ज्वरो आएका बिरामी बढेको वडाध्यक्ष गोकुल बुढाले बताए । इकाइमा जाँदा ताला लगाएको देख्दा रित्तो हात घर फर्कनुपरेको स्वास्थ्योपचार गर्न आएका नागरिकको गुनासो छ ।