रूपन्देही–पहिरो अवलोकन गर्न गएका बुटवल उपमहानगर मेयर शिवराज सुवेदीलाई मुक्का प्रहार गर्ने व्यक्तिको पहिचान खुलेको छ । मेयर सुवेदीमाथि मुक्का प्रहार गर्न स्थानीय पहिरोपीडित गणेश पंगेनी रहेको पुष्टि भएको हो ।

बुटवलको ज्योतिनगर आसपासमा निरन्तरको वर्षापछि केही दिनअघि गएको पहिरो अवलोकनका लागि त्यहाँ पुगेका मेयर सुवेदीलाई बुधबार पंगेनीले मुक्का प्रहार गरेका थिए । रातीदेखि परेको पानीले पहिरो खसेर केही घरमा क्षति पुगेको र नाली थुनिएको सूचना पाएपछि उपमहानगरका प्राविधिक लिएर प्रमुख सुवेदी प्रभावित क्षेत्र पुगेका थिए ।

पहिरोका कारण घर पूर्ण रूपमा क्षति भएपछि मुक्का हान्ने पहिरोपीडित गणेशसहितको ५ जनाको परिवार आफन्तकहाँ बस्दै आएका छन् । पहिरोबाट घरलगायत त्यहाँ भएका सबै सामग्री क्षति हुँदासमेत राज्यले राहत वितरण नगरेको भन्दै ज्योति नगरबासीले पनि मेयर सुवेदीसँग आक्रोश पोखेका थिए ।

नेकपा एमालेले बुटवल उपमहानगर सुवेदीलाई मुक्का प्रहार गर्नेलाई पक्राउ गरी कारबाहीको माग गरेको छ । एमाले बुटवल उपमहानगर कमिटीका अध्यक्ष बाबुराम पन्थी र राष्ट्रिय युवा संघ रूपन्देहीका अध्यक्ष मनोज गौचनले छुट्टाछुट्टै विज्ञप्ति निकाले मेयर सुवेदी कुट्नेलाई कारबाही गर्न माग गरेका छन् ।

रातीदेखि परेको पानीले पहिरो खसेर केही घरमा क्षति पुगेको र नाली थुनिएको सूचना पाएपछि उपमहानगरका प्राविधिक लिएर प्रमुख सुवेदी प्रभावित क्षेत्रमा गएका थिए ।

उनीसँगै उपप्रमुख गुमादेवी आचार्य, प्रमुख प्रशासकीय अधिकृत शिवप्रसाद रेग्मी, इन्जिनियर सुमन श्रेष्ठ, योगेश चापागाईं, लक्ष्मण अर्याल, नगर योजना आयोगका अधिकारीसहितको टोली निरीक्षणमा पुगेको थियो ।

पहिरो प्रभावित क्षेत्रका पीडितलाई प्रत्यक्ष भेट्ने, उद्दारमा ढिलाइ हुन नदिने, त्यहाँ भइरहेका सुरक्षा प्रबन्धलाई प्रभावकारी बनाउन लगाउने उद्देश्यसहित अवलोकन गर्न सुवेदी त्यहाँ पुगेको उपमहानगरले जनाएको छ ।

पंगेनी लुम्बिनी वाणिज्य क्याम्पसमा अध्ययनरत अनेरास्ववियु जिल्ला कमिटी सदस्य हुन् । विद्यार्थी राजनीति गर्दै आएका उनले स्थानीय सरकारले पहिरो व्यवस्थापनमा चासो नदिएकाले मुक्का हानेको प्रतिक्रिया दिएको प्रहरीले बताएको छ ।