काठमाडौं– कांग्रेस नेतृत्वको पाँच दलीय सत्ता गठबन्धनले व्याख्यात्मक घोषणासहित आइतबार नै अमेरिकी सहयोग सम्झौता एमसीसी पारित गर्ने निर्णय गरेको छ ।
प्रधानमन्त्री निवास बालुवाटारमा बिहान बसेको सत्ता गठबन्धनको बैठकले व्याख्यात्मक घोषणासहित एमसीसी संसद्बाट अनुमोदन गर्ने निर्णय गरेको कांग्रेसका वरिष्ठ नेता रामचन्द्र पौडेलले बताए । ‘व्याख्यात्मक टिप्पणीसहित संसद्मा पेस गरेर आइतबार नै एमसीसी पारित गर्न गठबन्धन सहमत भयो,’ उनले भने ।
नेकपा एकीकृत समाजवादीका अध्यक्ष माधव नेपालले पार्टीमा निर्णय गर्न बाँकी रहेको भन्दै समय मागे पनि समय नभएको बताउँदै आइतबार नै पारित गर्ने निर्णय गरिएको उनको भनाइ छ । नेता नेपाल सत्ता गठबन्धनको बैठकबाट छिट्टै बाहिरिएका थिए । अहिले एकीकृत समाजवादीको स्थायी कमिटी बैठक जारी छ ।
सत्ता गठबन्धनको बैठकअघि बिहान बसेको नेकपा माओवादी केन्द्रको कार्यालयको विस्तारित बैठकले एमसीसीलाई व्याख्यात्मक घोषणासहित अनुमोदन गर्ने निर्णय गरेको थियो । पाँच दलीय सत्ता गठबन्धनले एमसीसी पास हुँदै गर्दा प्रमुख प्रतिपक्षी एमालेले पनि साथ दिने विश्वास व्यक्त गरेको छ ।
‘सत्तारुढ गठबन्धन सहमत भइसकेको अवस्थामा एमाले पनि पक्षमा उभिने गठबन्धनको विश्वास छ । एमालेले नै एमसीसी संसद्मा लगेको हो,’ नेता पौडेलले भने ।
एमसीसीका पक्षमा मत प्रकट नगरे एमालेमाथि नैतिक प्रश्न उठ्ने पौडेलको भनाइ छ । ‘राजनीति दलसँग राजनीतिक नैतिकता हुनुपर्छ । त्यो नैतिकता छ कि छैन भन्ने एमालेको परीक्षण अब हुन्छ,’ नेता पौडेलले भने ।