काठमाडौं–कृषि मन्त्रालयले विश्व बैंकसँगको साझेदारीमा ग्रामीण उद्यम तथा आर्थिक विकास (रिड) आयोजना सुरु गरेको छ । आयोजना सञ्चालनका लागि ९ अर्ब ५० करोड रुपैयाँ बढी लगानी गरिनेछ ।

ग्रामीण उद्यम तथा आर्थिक विकास परियोजनाको कृषि तथा पशुपक्षी विकासमन्त्री महेन्द्रराय यादव र मालदिभ्स, नेपाल र श्रीलंकाका लागि विश्व बैंकका देशीय निर्देशक फारिस हदाद जेर्भाेसले बिहीबार संयुक्त रूपमा उद्घाटन गरे ।

कार्यक्रममा कृषिमन्त्री यादवले कृषि क्षेत्रको रुपान्तरण गर्न कार्यक्रम सुरु गरिएको बताए । साना किसान र सहकारीले उत्पादन गरेका वस्तुलाई बजार सुनिश्चित गर्न यो परियोजना महत्त्वपूर्ण हुने उनले विश्वास व्यक्त गरे ।
साना उत्पादक र किसानको आय बढाउन, कृषि उद्यमशीलता प्रवद्र्धन गर्न र ग्रामीण क्षेत्रमा रोजगारी सिर्जना गर्न यसले सघाउने मन्त्री यादवले जानकारी दिए ।

विश्व बैंकका देशीय निर्देशक जेर्भाेसले परियोजनाले नेपालको समावेशी विकासलाई सघाउ पुग्ने विश्वास व्यक्त गरे । परियोजनाले कफी, चिया, फलफूल र औषधी उत्पादनजस्ता क्षेत्रलाई उत्प्रेरित गर्ने उनको भनाइ छ । 

आयोजनाबाट कोभिड–१९ पछिको पुनरुत्थानमा सहयोग पुग्ने अपेक्षा गरिएको छ । रोजगारी सिर्जना गर्दै ग्रामीण बजार सम्बन्ध सुदृढ गर्ने, उद्यमशीलता प्रवद्र्धन गरी नेपालको कृषि क्षेत्रलाई बढावा दिने लक्ष्य राखिएको छ ।

ग्रामीण उद्यमीका लागि दिगो सम्बन्ध बढाउन प्रदेश १, २, बागमती, गण्डकी, लुम्बिनी र सुदूरपश्चिमलाई समेट्ने पाँच वटा आर्थिक करिडोरमा चुनिएका नगरपालिकामा यो परियोजना कार्यान्वयन गरिँदै छ । 

यो परियोजना सरकारको कृषि विकास रणनीति सन् २०१५–२०३५ सँग मिल्दोजुल्दो रहेको विश्व बैंकले विज्ञप्तिमार्फत जानकारी दिएको छ । परियोजनाले पूर्वाधार निर्माणमा कामका लागिसमेत सघाउ पुर्‍याउने र महिलासहित ५७०० बढी व्यक्तिका लागि छोटो अवधिको रोजगारी सिर्जना गर्ने विश्व बैंकको अपेक्षा छ ।