हेटौंडा– मकवानपुरमा यो वर्ष ४६ हजार ६७७ मेट्रिक टन धान उत्पादन भएको छ । कृषि ज्ञान केन्द्रका अनुसार गत वर्षको तुलनामा यो वर्ष जिल्लामा उत्पादनमा वृद्धि भएको हो । गत वर्ष ४४ हजार ४० मेट्रिक टन धान उत्पादन भएकामा यो वर्ष ४६ हजार ६७७ मेट्रिक टन उत्पादन भएको केन्द्रका सूचना अधिकारी मीनबहादुर पुनले जानकारी दिए ।

उनका अनुसार यो वर्ष २ हजार २५७ मेट्रिक टन उत्पादन बढेको हो । जिल्लामा यो वर्ष ३ दशमलव ७४ प्रतिहेक्टर उत्पादकत्व भएकामा गत वर्ष ३ दशमलव ७ प्रतिहेक्टर उत्पादकत्व थियो । उनले आधुनिक कृषि प्रणाली, सिँचाइ सुविधा, कृषकमा कृषिसम्बन्धी ज्ञान तथा उन्नत बिउबिजनका कारण जिल्लामा धान उत्पादन बढेको जानकारी दिए । 

जिल्लामा कुल १३ हजार ४२० हेक्टर क्षेत्रफलमा धान खेती हुने गरेको उनको भनाइ छ । उक्त क्षेत्रफलमा अनुमानित ५० हजार १९० मेट्रिक टन उत्पादन हुनुपर्नेमा बेमौसमी वर्षाले ३ हजार ५१३ मेट्रिक टन धानमा क्षति भएको सूचना अधिकारी पुनले बताए ।

जिल्लामा सावित्री, सावा, रामधान, मकवानपुरे, वारलगायतका धान लगाइन्छ । जिल्लाका सबै स्थानीय तहमा धान खेती हुने गरेको छ । सबैभन्दा धेरै मनहरि गाउँपालिकामा धान खेती हुने गरेको छ । त्यहाँ ३ हजार ९२५ हेक्टर क्षेत्रफलमा धान उत्पादन हुने गरेको छ ।

हेटौंडा उपमहानगरमा २ हजार, थाहा नगरपालिकामा २००, बागमतीमा २ हजार ७००, बकैयामा १ हजार ७००, मकवानपुरगढीमा १ हजार ४००, कैलाशमा १ हजार १००, भिमफेदीमा २००, राक्सिराङमा १५० र इन्द्रसरोवर गाउँपालिकामा ४५ हेक्टर क्षेत्रफलमा धान खेती हुने गरेको केन्द्रले जानकारी दिएको छ ।