भैरहवा । रुपन्देहीको सियारी गाउँपालिकामा पशु सेवा केन्द्र (भेटेनरी अस्पताल) निर्माण हुने भएको छ । भेटेनरी अस्पतालमा पाइने सेवा सुविधासहितको सेवा केन्द्र निर्माण हुन लागेको हो ।
नेपाल लाइभस्टक सेक्टर इनोभेसन प्रोजेक्टको आयोजनामा बन्न लागेको सेवा केन्द्रको गृहमन्त्री बालकृष्ण खाणले शिलान्यास गरेका छन् ।
यस प्रोजेक्ट कृषि तथा पशुपंक्षी बिकास मन्त्रालय र विश्व विकास बैंकद्वारा संचालित आयोजना हो । भवन निर्माणका लागि विश्व विकास बैंकको आर्थिक सहयोग रहने आयोजनाले जनाएको छ ।
उक्त परियोजना पशु सेवाको क्षेत्रमा नविन प्रविधिको माध्ययमबाट पशु तथा पशुजन्य पदार्थको उत्पादन र उत्पादकत्व बृद्धि, मुल्य श्रृंखलाको विकास गरी कृषकलाई उद्यमी बनाउन तथा ग्रामिण क्षेत्रका जनताको जिविको पार्जन एवं खाद्यन्न र पोषण सुरक्षामा काम गर्ने सस्था भएको आयोजना निर्देशक डा. उमेश दाहालले जानकारी दिए ।
उनका अनुसार आयोजनाले देशका २८ जिल्लाका २८९ गाउँपालिका/नगरपालिकामा काम गर्दै आएको छ ।
शिलान्यास कार्यक्रममा सियारी गाउँपालिका अध्यक्ष थानेश्वर घिमिरेले भेटेनरी अस्पताल निर्माण भएपछि सियारीबासी कृषकको आर्थिक उपार्जनमा महत्वपुर्ण योगदान पुग्ने बताए ।
उनले किसानको सहजताका लागि सियारीमा अस्पताल निर्माण गर्न पहल गरिएको बताउँदै पशु तथा पशुजन्य पदार्थको उत्पादन र उत्पादकत्व वृद्धिमा ठुलो टेवा पुग्ने बताए ।
गाउँपालिका उपाध्यक्ष तारा थारुले अस्पताल निर्माणपछि महिलाको आर्थिक वृद्धिमा समेत टेवा पुग्ने बताइन् ।