रूपन्देही– बुटवल उपमहानगरले कोभिड–१९ का कारण गत वर्ष कार्यान्वयन हुन नसकेका योजना सम्पन्न गर्न पुनः म्याद थपेको छ । गत वर्ष कार्यान्वयनमा नआएका योजनाका लागि गत चैत अन्तिम मिति तोकेको उपमहानगरले पुनः १५ दिने म्याद थपेको हो ।
फागुन मसान्तसम्म सबै योजनाको सम्झौता गरी कार्यान्वयनमा जाने लक्ष्य लिएको उपमहानगरले १ महिना थपेर चैत्र मसान्तसम्म सबै योजनाहरूको सम्झौता गर्ने गरी समयसीमा परिवर्तन गरेको थियो ।
उपमहानगरले १५ वैशाखसम्म गत आर्थिक वर्ष २०७६÷७७ मा स्थगित भएका योजनालाई यसै आर्थिक वर्षमा सक्ने गरी पुनः म्याद थपेको हो । कोभिड–१९ का कारण यस वर्ष पनि सबै योजना कार्यान्वयन हुनेमा शंका उत्पन्न भएको छ ।
गत आर्थिक वर्षका योजना २८९ बाँकी रहेकामा चालू आर्थिक वर्षको चैत मसान्तसम्म २४८ योजना पूरा गरिसकेको महानगरले जनाएको छ ।
चालू आर्थिक वर्षमा कार्यान्वयनमा ल्याएका ४०७ योजनामध्ये २५ योजना मात्रै सम्पन्न भएको बुटवल उपमहानगरको नियमित पत्रकार सम्मेलनमा जानकारी गराइएको हो ।
चालू आर्थिक वर्षका लागि गत वर्षसहितका ८१४ योजना स्वीकृत भएका थिए । यीमध्ये ६९६ योजना कार्यान्वयनमा गएका थिए ।
बुटवल उपमहानगरले चैत मसान्तसम्म ३६ प्रतिशत मात्रै पुँजीगत खर्च गरेको छ । चालू आर्थिक वर्षमा ३६.२४ प्रतिशत मात्रै खर्च भएको उपमहानगरका प्रवक्ता रामप्रसाद रेग्मीले बताए ।
चालू खर्च ४४.८१ प्रतिशत र वित्तीय खर्च ४२.६६ प्रतिशत खर्च भएको उनले जानकारी दिए । चालू आर्थिक वर्षको चैत मसान्तसम्म अनुमानित आयको ७०.४५ प्रतिशत आम्दानी गरेको उपमहानगरले बताएको छ ।
२ अर्ब २० करोड ३४ लाख रुपैयाँ अनुमानित आम्दानी लक्ष्य राखेको उपमहानगरले १ अर्ब ६२ करोड १४ लाख आम्दानी गरिसकेको जनाएको छ ।
संघीय सरकारबाट अनुमानित ५३.६३ प्रतिशत, प्रदेश सरकारबाट ८०.९८ प्रतिशत, राजस्व बाँडफाँटबाट ७४.८१ प्रतिशत, आन्तरिक स्रोत ऋणसमेत गर्दा ७०.६२ प्रतिशत आम्दानी भएको हो ।
उपमहानगरले कक्षा ५ सम्मका बालबालिकालाई प्रदान गरिने दिवा खाजाबापतको फागुनसम्मको रकम निकासा गरेको जनाएको छ । सिंगो बुटवल, एक विद्यालयको अवधारणालाई कार्यान्वयन गराउन कार्ययोजनाको प्रारम्भिक मस्यौदा तयार गरी अन्तिम छलफल भइरहेको उपमहानगरले बताएको छ ।