ताप्लेजुङ– कार्यपालिका प्रवक्तासहितका जनप्रतिनिधिले बजेट अधिवेशन वहिष्कार गरे पनि ताप्लेजुङको मैवाखोला गाउँपालिकाले करिब ३५ करोड रुपैयाँको नीति तथा कार्यक्रम र बजेट पारित गरेको छ । पालिकाले ३४ करोड ७३ लाख ४९ हजार रुपैयाँको बजेट पारित गरेको हो ।

 

चालूतर्फ ५ करोेड ६८ लाख ६५ हजार र २९ करोड ४ लाख ८४ हजार रुपैयाँको बजेट सार्वजनिक गरिएको छ । अन्य पालिकाभन्दा मैवाखोला गाउँपालिकाले ठीक विपरीतको बजेट ल्याएको छ ।

 

अरू पालिकाले चालू खर्च बजेट र पुँजीगत खर्च कम भएको बजेट ल्याएका छन् । मैवाखोलाले भने चालू खर्चको तुलनामा ५ गुणा बढी रकमको पुँजीगत बजेट ल्याएको छ । 

 

गाउँपालिकाले संघीय र प्रदेश सरकारबाट प्राप्त वित्तीय समानीकरण, ससर्त अनुदान, विशेष अनुदान, राजस्व बाँडफाँट र समपुरक अनुदान तथा पालिकाको आन्तरिक आय र आन्तरिक स्रोत नगद मौज्दात (अल्या) रकमबाट बजेटको स्रोत जुटाउने भनेको छ ।

 

उपाध्यक्ष कौशिल थत्लुङद्वारा प्रस्तुत बजेटअनुसार संघीय सरकारबाट वित्तीय समानीकरण अनुदान ९ करोड ८५ लाख, राजस्व बाँडफाँटबापतको अनुदान ५ करोड ५२ लाख ६४ हजार, ससर्त अनुदान १७ करोड २५ लाख गरी कुल ३२ करोड ६२ लाख ६४ हजार रुपैयाँको सिलिङ प्राप्त भएको छ ।

 

यस्तै, प्रदेश सरकारबाट समानीकरण अनुदान ५५ लाख ५४ हजार, ससर्त अनुदान ५ लाख ३१ हजार र समपुरक अनुदान १ करोड गरी कुल १ करोड ६० लाख ८५ हजारको बजेट सिलिङ प्राप्त भएको छ ।

 

आन्तरिक आम्दानी २५ लाख र आन्तरिक स्रोतअन्तर्गत नगद मौज्दात (अल्या) २ करोड ५० लाख रुपैयाँसमेतको रकमलाई आधार मानी पालिकाले आगामी आर्थिक वर्ष २०७८/०७९ का लागि बजेट ल्याएको उपाध्यक्ष थत्लुङले जानकारी दिइन् । 

 

किसानलाई सहुलियत ऋण उपलब्ध गराउन कोष, विद्यार्थीलाई मनोसामाजिक परामर्श

 

गाउँपालिकाले निर्वाहमुखी कृषि प्रणालीलाई व्यावसायिक र आधुनिकीकरण गर्ने प्रयासस्वरूप किसानलाई सहुलियत ऋण उपलब्ध गराउन छुट्टै कोष बनाउने भएको छ । अध्यक्ष राजनकुमार थत्लुङद्वारा प्रस्तुत नीति तथा कार्यक्रमअनुसार पालिकाका नागरिकलाई खाद्यान्नमा आत्मनिर्भर बनाउन उन्नत जातका बिउबिजन र उत्पादनका सामग्री अनुदानमा दिइने भएको छ ।

 

कोभिड–१९ महामारीका कारण रोजगारी गुमाएकालाई सामूहिक उद्यम सिर्जनाका लागि सीपमूलक तालिम दिई अनुदानको व्यवस्था गर्ने तथा घरेलु सीप र अनुभवका आधारमा व्यवसाय सञ्चालन गर्न सहुलियतपूर्ण ऋण उपलब्ध गराउने पालिकाले घोषणा गरेको छ । 

 

पालिकाले भौतिक पूर्वाधार निर्माणका आयोजनामा वातावरण सन्तुलनलाई समेत ध्यानमा राखेर मानव स्रोतको अधिकतम प्रयोग गर्ने र सोहीमार्फत रोजगारी सिर्जनामा सहयोग पु¥याउने भनेको छ । पालिकाभित्रका जग्गाविहीन सुकुम्बासीलाई यसै आर्थिक वर्षभित्र व्यवस्थापन गर्ने गरी आधार तयार गरिने भएको छ ।

 

पालिकाले कोभिड–१९ का कारण विद्यार्थीलाई पर्न गएको मानसिक असर कम गर्न मनोसामाजिक परामर्श कार्यक्रम चलाउने भएको छ । पालिकाले उत्कृष्ट कार्य सम्पादन गर्ने विद्यालय व्यवस्थापनदेखि शिक्षक र विद्यार्थीसमेतलाई पुरस्कार तथा सम्मान गर्ने भएको छ । 

 

प्रवक्तासहितका जनप्रतिनिधिले गरे बजेट अधिवेशन वहिष्कार

 

बजेट विनियोजन प्रक्रियामा अध्यक्ष र उपाध्यक्षले आफ्नो वडालाई उपेक्षा गरेको भन्दै वडा नम्बर ३ का वडाध्यक्ष थर्ककुमार चोङ्वाङसहितका पदाधिकारीले पालिका अधिवेशन वहिष्कार गरेका छन् ।

 

बजेट विनियोजनको विवाद वहिष्कारसम्ममा पुगेपछि अधिवेशनले बहुमतका आधारमा बजेट पारित गर्नुपरेको छ । ‘हाम्रो वडालाई अपेक्षा गरेको स्थिति बताएपछि वडापालिकाका सबै सदस्यले बजेट अधिवेशनमा नजाने भन्नुभयो’, गाउँपालिकाका प्रवक्तासमेत रहेका चोङ्वाङले भने, ‘त्यसपछि पालिका अधिवेशनमा गइएन । भरे बुझ्दा वडा नम्बर १ का वडाध्यक्ष दुर्गा तामाङ पनि आउनुभएन छ ।’

 

उनले बहुमतका आधारमा बजेट पारित भएको खबर आफूले सुनेको जानकारी दिए । २५ लाख रुपैयाँ बजेटबाट वडा नम्बर ३ मा समावेशी भवन बनाउन गरेको प्रस्ताव अध्यक्ष थत्लुङ र उपाध्यक्ष कौशिला थत्लुङले ठाडै अस्वीकारेको चोङ्वाङको आरोप छ ।

 

समावेशी भवनमा नभए तुम्बेस्थित सरस्वती आधारभूत विद्यालयको भवनमा योजना लगाउन गरिएको प्रस्ताव पनि रोकिएकाले वडा नम्बर ३ प्रति गरिएको पूर्वाग्रहका कारण आफूहरूले बजेट अधिवेशन वहिष्कार गरेको चोङवाङले बताए ।

 

उनका अनुसार यसपटक समावेशी भवन निर्माणका लागि बजेट पाउने पालो वडा नम्बर ३ को थियो । ६ वटा वडा रहेको मैवाखोलामा अध्यक्ष र उपाध्यक्षसहित ३२ सदस्य पालिकासभामा १ जना वडा सदस्य कांग्रेसबाट विजयी हुन् ।

 

बाँकी ३१ जना एमालेबाट नर्वाचित हुन् । पछि कार्यपालिकामा निर्वाचित २ जना पनि एमालेबाटै निर्वाचित भएका थिए ।