ताप्लेजुङ– पालिका अध्यक्षलाई कोरोना संक्रमण भएपछि रोकिएको ताप्लेजुङको सिदिङ्वा गाउँपालिकाको बजेट अधिवेशन ३० असारका लागि आह्वान भएको छ । पालिका अध्यक्षलाई कोरोना संक्रमण पुष्टि भएपछि रोकिएको आगामी आर्थिक वर्षका लागि बजेट आह्वान गरिएको हो ।

गाउँसभाका सदस्य सचिव एवं गाउँपालिकाका प्रमुख प्रशासकीय अधिकृत सुमन लिङ्देन लिम्बूका अनुसार पालिका अध्यक्ष नरबहादुर कडरियाले गाउँ तथा नगरसभा सञ्चालन ऐन, २०७५ को दफा ३ बमोजिम ३० असारका लागि बजेट अधिवेशन आह्वान गरेका हुन् ।

नीति तथा कार्यक्रम प्रस्तुत गर्ने पालिका अध्यक्षलाई कडरियालाई कोरोना संक्रमण भएपछि पालिकाले यसअघि १० असारमा अगामी आर्थिक वर्ष २०७८/७९ का लागि नीति, कार्यक्रम र बजेट प्रस्तुत गर्न सकेको थिएन ।

प्रमुख प्रशासकीय अधिकृत लिङ्देनका अनुसार गाउँसभाका सातौँ तथा चालू आवको बर्खे अधिवेशनमा आगामी आवको नीति तथा कार्यक्रम र बजेट प्रस्तुत गरिने कार्यसूची तयार भएको छ । 

यस्तै, आर्थिक र विनियोजिन विधयेक, न्यायिक समितिको वार्षिक प्रतिवेदन र विभिन्न कानुनको संशोधन विधयेकसमेत प्रस्तुत गर्ने कार्यतालिका रहेको लिङ्देनले जानकारी दिए ।

ताप्लेजुङका ९ स्थानीय तहमध्ये सिरिजंगा गाउँपालिकाले ३ असारमा, मेरिङ्देनले ९ असारमा र फुङ्लिङ नगरपालिका, आठराई त्रिवेणी, फक्ताङ्लुङ, मैवाखोला, मिक्वाखोला र पाथीभरा याङ्बरक गाउँपालिकाले १० असारमा आगामी आवका लागि नीति, कार्यक्रम र बजेट ल्याएका थिए ।