काठमाडौं–टाटा मोटर्स भारतीय बजारमा सबैभन्दा बढी यात्रुवाहक गाडी बिक्री गर्ने कम्पनीमध्ये दोस्रो स्थानमा परेको छ । यसअघि हुन्डाईले बजारमा टाटाको तुलनामा बढी गाडी बिक्री गरिरहेको थियो । सन् २०२१ को डिसेम्बरसम्मको तथ्यांकअनुसार हुन्डाईको बिक्रीलाई उछिन्दै टाटा मोटर्स दोस्रो स्थानमा परेको हो।

यसबाहेक टाटाले सन् २०२१ को डिसेम्बर महिनामा मात्रै मासिक दरमा सबैभन्दा बढी गाडी बिक्री गरेको छ । त्यस्तै, कम्पनीले अक्टोबरदेखि डिसेम्बरबीचको त्रैमासिकमा समेत धेरै गाडी बिक्री गरेको छ । सन् २०२१ को सुरुआतदेखि अन्तिमसम्मको बिक्री आँकडाअनुसार वर्षभरिमै सबैभन्दा बढी गाडी बिक्री गरेको हो ।

तथ्यांकअनुसार टाटा मोटर्सले डिसेम्बरमा मात्रै ३५ हजार ३ सय वटा गाडी बिक्री गरेको छ । दक्षिण कोरियाली कार उत्पादक कम्पनी हुन्डाईले डिसेम्बरमा जम्मा ३२ हजार ३ सय १२ वटा गाडी बिक्री गरेको छ । टाटा मोटर्सले अक्टोबरदेखि डिसेम्बरको त्रैमासिकमा ९९ हजार गाडी बिक्री गरेको छ भने सन् २०२१ को अन्तिम दिनसम्म जम्मा ३ लाख ३१ हजार वटा गाडी बिक्री गरेको छ । 

बजारमा सेमिकन्डक्टर अभावका कारण उत्पादनमा कमी देखिए पनि टाटा मोटर्सका प्यासेन्जर भेहिकल बिजनेस युनिटका अध्यक्ष सैलेश चन्द्रले कम्पनीको यात्रुवाहक सवारीको व्यवसायले त्रैमासिक अवधिमा कोसेढुंगा कायम गरेको बताए ।

‘टाटा मोटर्सले दशककै उच्च त्रैमासिक र मासिक बिक्री रेकर्ड बनाएको छ । गत आर्थिक वर्षको तुलनामा २०२१ मा कम्पनीको सेल्समा ठूलो परिवर्तन देखिएको छ,’ अध्यक्ष सैलेश चन्द्रले भने, ‘कम्पनीले सन् २०२१ मा कुल ३ लाख ३१ हजार १ सय ७८ वटा गाडी बिक्री गरेको छ । टाटाले यात्रुवाहक सवारीसाधनको व्यवसाय स्थापना सुरु गरेदेखिको यो अहिलेसम्मकै उच्च बिक्री तथ्यांक हो ।’

उनका अनुसार ‘न्यू फरेबर’ का मोडलका कारण पनि गाडी बिक्री र माग बढेको छ । टाटा मोटर्सले सन् २०२१ मा विद्युतीय गाडीको समेत बिक्री बढाएको छ । कम्पनीले २०२१ अन्तिमसम्म कुल २२ हजार ५ सय ५५ वटा विद्युतीय गाडी बिक्री गरेको छ । अघिल्लो आर्थिक वर्षको त्रैमासिकमा जम्मा १.८ प्रतिशत विद्युतीय गाडी बिक्री गरेको टाटा मोटर्सले यो वर्षको त्रैमासिकसम्म विद्युतीय गाडी बिक्री ५.६ प्रतिशतले बढाएको हो ।

कम्पनीका अनुसार यसले सन् २०२१ को डिसेम्बरमा पहिलो पटक मासिक २ हजार बढी विद्युतीय गाडी बिक्री गरेको हो । ‘बजारमा विद्युतीय नेक्सन र विद्युतीय टिगोरको माग बढ्दो छ । यसले विद्युतीय मोडलको बिक्रीमा तीव्रता आएको छ । समग्रमा विद्युतीय मोडलले राम्रो बजार पाएको छ,’ कम्पनीको प्यासेन्जर भेहिकल बिजनेस युनिटका अध्यक्ष सैलेश चन्द्रले भने, ‘तर भविष्यमा पनि सेमिकन्डक्टरको आपूर्ति अनिश्चितताका कारण उत्पादन एवं बिक्रीमा केही प्रभाव पर्ने सम्भावना छ । यसका लागि कोभिडको जोखिमलाई पनि नजिकबाट ट्रयाक गर्न आवश्यक छ । यद्यपि हामी व्यावसायिक योजनामा काम जारी राख्नेछौँ ।’