माघ ०७, २०७८
काठमाडौं– नेपाल टेलिकमले एफटीटीएच उपलब्ध नभएका सुगमका साथै अधिकांश दुर्गम स्थानमा द्रुत गतिको डेटा भ्वाइस सेवा उपलब्ध गराउन फोरजी एलटीई नमस्ते वाईफाई विस्तार गर्ने भएको छ । कम्पनीले फोरजी एलटीई नमस्ते वाईफाई सेवाका विभिन्न प्याकेज उपलब्ध गराइरहेको छ ।
कम्पनीले उपलब्ध गराइरहेका यी प्याकेज आवश्यक डिभाइससहित ग्राहकलाई सहज रुपले प्राप्त होस् भनी टेलिकम र साइबरनेटिक्स प्रालिबीच सम्झौता भएको छ । सम्झौतामा कम्पनीका प्रमुख व्यावसायिक अधिकृत संगीता पहाडी र साइबरनेटिक्सका सीईओ जेम्स न्याछ्योले हस्ताक्षर गरे ।
फोरजी एलटीई नमस्ते वाईफाईमार्फत टेलिकमले हाल व्यक्तिगत र सरकारी संस्था गरी दुई प्रकारका प्याकेज उपलब्ध गराइरहेको छ । व्यक्तिगत प्याकेजअन्तर्गत होम ब्रोडब्यान्ड बेसिक ८ सय रुपैयाँमा ६० जीबी ३० दिनका लागि उपलब्ध हुने कम्पनीले जनाएको छ ।
त्यसैगरी १ वर्षका लागि ९ हजार रुपैयाँमा ७२० जीबी प्याक पाइने टेलिकमले बताएको छ । यसलाई प्रतिमहिना ६० जीबीका दरले १२ महिनासम्म प्रयोग गर्न सकिन्छ । यी दुवैमा एड अन प्याकको रूपमा ४ सय रुपैयाँमा १५ दिनका लागि ६० जीबी प्याक लिन सकिनेछ ।
होम ब्रोडब्यान्ड प्रिमियमअन्तर्गत १२ सय रुपैयाँमा १२० जीबी प्याक ३० दिनका लागि उपलब्ध हुनेछ । १ वर्षका लागि १३ हजार ५ सय रुपैयाँमा १४४० जीबी प्याक उपलब्ध हुने टेलिकमले जनाएको छ । यसलाई प्रतिमहिना १२० जीबीको दरले १२ महिनासम्म प्रयोग गर्न सकिन्छ । यी दुवैमा एड अन प्याकको रूपमा ६ सय रुपैयाँमा १५ दिनका लागि १२० जीबी प्याक लिन सकिनेछ ।
सरकारी संस्था प्याकेजमा ३६ सय ५० र २१ सय रुपैयाँमा ३० दिनका लागि विभिन्न प्याकेज उपलब्ध रहेको टेलिकमले बताएको छ । यी प्याकेजबाट अनलिमिटेड डेटा चलाउन सकिनेछ । वार्षिक र अर्धवार्षिक रूपमा एकमुष्ट प्याकेज लिने ग्राहकका लागि निश्चित छुटको समेत व्यवस्था गरिएको कम्पनीले जनाएको छ ।
फागुन १०, २०७८
फागुन ०२, २०७८
कात्तिक १४, २०८१
