सिन्धुपाल्चोक– अध्यक्ष उद्यमशिलता कार्यक्रम मार्फत उद्यम गर्न चाहने गाउँपालिका भित्रका स्थानीयलाई लक्षित गरेर लिसंखुपाखर गाउँपालिकाले विनाधितो ऋण अनुदानका लागि प्रक्रिया सुरु गरेको छ ।

गाउँमै बसेर उद्यम गर्न चाहने स्थानीयलाई लक्षित गरेर लिसंखुपाखर गाउँपालिकाले विनाधितो १० लाख रुपैयाँसम्म कर्जा उपलब्ध गराउन यसअघि नै नेपाल बैंकसंँग सम्झौता गरिसकेको छ ।

गाउँपालिकाले १ प्रतिशत ब्याजदरमा उद्यम गर्न चाहनेहरुका लागि ऋण उपलब्ध गराउने नयाँ कार्यक्रम सुरुवात गरेको थियो । नेपाल बैंकसँग दशैअघि नै सम्झौता भएपनि कोरोनाका कारण केही समय कार्यालय बन्द भएपछि अहिले यसका लागि निवेदन माग भएको गाउँपालिकाका प्रमुख प्रशासकीय अधिकृत पुर्णप्रसाद दुलालले जानकारी दिए ।

गाउँमा नै उद्यम व्यवसाय गर्न जोसजाँगर भएपनि आर्थिक अभावमा समस्यामा परेकालाई लक्षित गरेर कार्यक्रम सुरु गरेको र पहिलो वर्ष ५ करोड सम्म १ प्रतिशत ब्याजदरमा ऋण उपलब्ध गराउने लक्ष्य रहेको गाउँपालिकाका अध्यक्ष कमल नेपालले जानकारी दिए ।

गाउँपालिकाले २८ कात्तिकभित्र वडाको सिफारिससहित आफुले सुरु गर्ने व्यवसायको प्रकृति उल्लेख गरेर निवेदन दिन गाउँपालिका भित्रका स्थानीयलाई आग्रह गरिएको अध्यक्ष नेपालले जानकारी दिए ।

गाउँपालिकाले कार्यविधि नै बनाएर बिनाधितो १ प्रतिशत व्याजदरमा कर्जा उपलब्ध गराउने भएपछि  गाउँपालिकाका धेरै स्थानीय यो कर्जा लिन इच्छुक देखिएको अध्यक्ष नेपालले जानकारी दिए ।

पहिलो चरणमा १० दिनको म्याद राखेर आवश्यक कागजपत्र मात्रै माग गरिएको र त्यसपछि पेशा व्यवसायलाई वर्गीकरण गरेर अरु प्रक्रिया सुरु गरिने प्रमुख प्रशासकीय अधिकृत दुलालले जानकारी दिए ।

१० दिन भित्र आएका निवेदनलाई वर्गीकरण गरेर आवश्यक परेमा तालिम समेत सञ्चालन गरेर त्यसपछि मात्रै ऋणका लागि बैंकलाई सिफारिस गरिने गाउँपालिकाले जानकारी दिएको छ ।

अध्यक्ष उद्यमशीलता विकास कार्यक्रममा गाउँपालिकाले उद्यम गर्न चाहने सबैलाई समेटेर कर्जा उपलब्ध गराउनेछ । गाउँपालिकाको प्रमुख प्राथमिकतामा भने वैदेशिक रोजगारीबाट फर्केर गाउँमै उद्यम, व्यवसाय गर्ने चाहने तर आर्थिक अभावमा नभएकाहरू रहनेछन् ।  

त्यसैगरी व्यवसायिक कृषि तथा पशुपन्छी कर्जाअन्तर्गत १९ प्रकृतिको व्यवसायका लागि सहुलियत कर्जा गाउँपालिकाले उपलब्ध गराउनेछ । शिक्षित युवा स्वरोजगार कर्जा, वैदेशिक रोजगारीबाट फर्केका युवा परियोजना कर्जा पनि गाउँपालिकाले उपलब्ध गराउनेछ ।

कृषि व्यवसाय उत्पादन, प्रशोधन, भण्डार तथा बिक्री वितरणका लागि पनि यो कर्जा उपलब्ध गराइने गाउँपालिका उपाध्यक्ष हेमगंगा मोक्तानले बताइन् । ‘किसानलाई खाद्यान्न, नगदेबाली, फलफूल, जडीबुटी, सिँचाइ उपकरण, कृषि औजार खरिदका लागि पनि कर्जा उपलब्ध गराइनेछ’, उपाध्यक्ष मोक्तानले भनिन् ।

गाउँपालिकाले यसअघि कृषिलगायतका क्षेत्रमा ५० हजारदेखि १ लाखसम्म अनुदान उपलब्ध गराउँदै आएको थियो । तर, त्यो अनुदानको प्रभावकारिता नदेखिएकाले नयाँ कार्यक्रम ल्याइएको प्रमुख प्रशासकीय अधिकृत पूर्णप्रसाद दुलालले जानकारी दिए ।

राष्ट्रबैंकले सहुलियतपूर्ण कार्यविधि, २०७५ अनुसार विभिन्न क्षेत्रमा लगानी गर्न बैंकहरूलाई निर्देशन दिएको नेपाल बैंक लिमिटेडका प्रमुख कार्यकारी अधिकृत कृष्णबहादुर अधिकारीले बताए ।

स्थानीयले लिएको सहुलियत कर्जाको व्याजदरका लागि गाउँपालिकाले नेपाल बैंकमा पहिलो वर्ष १ करोड ५० लाख रुपैयाँ मुद्दती खातामा जम्मा गर्नेछ । उक्त रकमबाट गाउँपालिकाले एक वर्षमा साढे १० लाख रुपैयाँ ब्याज दिनेछ । एक वर्षमा गाउँपालिकाले ५ करोड लगानी गरे करिब १६ लाख ब्याज बैंकलाई बुझाउनुपर्ने गाउँपालिकाका प्रमुख प्रशासकीय अधिकृत दुलाल बताउँछन् ।