नुवाकोट– दुप्चेश्वर गाउँपालिकाले फागुन मसान्तभित्र योजना सम्झौता गर्न निर्देशन दिएको छ । गाउँपालिकाभित्र चालु आर्थिक वर्षमा योजना सञ्चालनका लागि बाँकी रहेका उपभोक्ता समिति तथा ठेकेदारलाई फागुन मसान्तभित्र योजना सम्झौता गर्न निर्देशन दिएको हो । सम्झौता भएका योजनाको जेठ मसान्तसम्म अन्तिम भुक्तानी दिइसक्ने गरी गाउँपालिकाले योजना बनाएको हुँदा यस्तो निर्देशन दिएको पालिकाले जनाएको छ । 

गत बिहीबार बसेको गाउँ कार्यपालिकाको बैठकले फागुन मसान्तसम्म गाउँपालिकामा सञ्चालन हुने कामको योजना सम्झौता गर्ने तथा जेठ मसान्तभित्र फरफारक गर्ने निर्णय गरेको गाउँपालिकाका अध्यक्ष शङ्कर बहादुर थापाले बताए । पालिकाको पूँजीगत खर्चको गुणस्तर बढाउन योजनाहरुको सम्झौता फागुन मसान्तभित्रमा गरिसक्न निर्देशन दिइएको उनले जानकारी दिए । 

उनका अनुसार पालिका क्षेत्र पहाडी भूभागमा पर्ने भएकाले वर्षायाममा काम गर्न कठिनाइ हुन्छ । आर्थिक वर्षको अन्त्यतिर काम सुरु हुँदा हतारमा काम हुने र गुणस्तरीयता समेत नहुने भएकाले फागुन मसान्तसम्म योजना सम्झौता र जेठ मसान्तसम्म फरफारक गर्ने निर्णय गरेको हो । 

समयमै योजना सम्पन्न भएमा योजनाको अनुगमन र भुक्तानी समयमै गर्न सकिने उनले पालिकाखबरलाई बताए । ‘ठेक्कामार्फत सञ्चालन हुने ठूला बजेट र महत्वपूर्ण योजनाहरुको लगभग सम्झौता भइसक्यो । उपभोक्ता समितिबाट हुने साना योजनाहरुको केही सम्झौता हुन बाँकी छ ।’ 

जेठ/असारमा हतारो गर्नुभन्दा अहिलेदेखि नै गुणस्तरीय काम गर्न थाल्न लागिएको उनले बताए । गाउँपालिकाले तोकेको समय पछाडि सम्झौता तथा भुक्तानीका लागि पेश हुने योजनामा गाउँपालिका जिम्मेवार नरहने समेत गाउँपालिकाले जनाएको छ ।